მოემზადეთ წვიმიან ფორკსში დასაბრუნებლად: სტეფანი მეიერის საკულტო ვამპირული საგა მალე ისევ გაცოცხლდება ეკრანზე, ამჯერად — ნეტფლიქსზე.

ცოტა ხნის წინ გახდა ცნობილი, რომ კომპანია ბინდის საგის ერთ-ერთი წიგნის, შუაღამის მზის, მიხედვით ანიმაციურ სერიალს გადაიღებს. ჯერ კიდევ გასული წლის გაზაფხულზე გავიგეთ, რომ ბელასა და ედვარდის სასიყვარულო ისტორია სერიალად იქცეოდა, მოგვიანებით კი, დაზუსტდა, რომ ეს ანიმაცია იქნებოდა. თუმცა, ამჯერად პროექტის შესახებ უფრო მეტ დეტალს მოეფინა ნათელი. ქვემოთ ვრცლად მოგიყვებით, რას უნდა ველოდოთ მომავალი სერიალისგან.

რა არის შუაღამის მზე

შუაღამის მზე მეიერის საგის მე-5 ნაწილად მიიჩნევა, მაგრამ, რეალურად, ის პირველ წიგნში მოთხრობილი ამბის ედვარდისეული პერსპექტივაა. ხანგრძლივი მოლოდინის შემდეგ, რომანი 2020 წელს გამოიცა და მაშინვე ბესტსელერი გახდა — პირველივე კვირაში მილიონზე მეტ ეგზემპლარად გაიყიდა.

შუაღამის მზეზე მუშაობა მწერალმა ჯერ კიდევ პირველი ფილმის გამოსვლამდე დაიწყო და მას წერით ექსპერიმენტს უწოდებდა. რაც უფრო მეტს ვწერდი, მით მეტად ვრწმუნდებოდი იმაში, რომ ედვარდი ამ ისტორიის საკუთარ ვერსიას იმსახურებდაო, აღნიშნავდა მეიერი. თუმცა, 2008 წელს ინტერნეტში რომანის დაუმთავრებელი ვერსია არალეგალურად გავრცელდა, რამაც სტეფანი აღაშფოთა და წერა განუსაზღვრელი დროით შეაწყვეტინა.

საბოლოოდ, ფანების დაუსრულებელი და დაჟინებული თხოვნით, მეიერი რომანს მიუბრუნდა და ის ბინდის 15 წლის საიუბილეოდ გამოაქვეყნა.

• "მსურდა თუ არა, შუაღამის მზე უნდა დამესრულებინა" — ინტერვიუ სტეფანი მეიერთან

თავად მეიერიც აღნიშნავს, რომ შუაღამის მზე ბინდზე გაცილებით დამთრგუნველია — ბელასგან განსხვავებით ხომ, ედვარდს ჰგონია, რომ მათი სიყვარული ტრაგედიით დამთავრდება. ამასთან, ამბის ედვარდისეული ვერსია ბელას მონათხრობზე ლამის ორჯერ დიდია. ამის მიზეზი ერთი ისაა, რომ ედვარდი ყველაფერზე უფრო ბევრს და ღრმად ფიქრობს; გარდა ამისა, მას სხვების აზრების გაცნობაც შეუძლია, რაც წიგნს ბინდზე უფრო საინტერესო საკითხავად აქცევს.

• ბელა სუონი კარგი პერსონაჟია — აი, რატომ

რას ველოდებით ნეტფლიქსის ეკრანიზაციისგან

შუაღამის მზის ანიმაციურ სერიალზე მუშაობა უკვე დაწყებულია. საგის ფანებისთვის დამაიმედებელი ამბავი ისაა, რომ პროექტში თავად სტეფანი მეიერიცაა ჩართული — იგი სერიალის ერთ-ერთი აღმასრულებელი პროდიუსერი იქნება. აღმასრულებელი პროდიუსერის როლს მოირგებს ასევე შინეიდ დელი, რომელსაც ისეთ პროექტებზე უმუშავია, როგორიცაა მოსიარულე მკვდრების სპინ-ოფი The Walking Dead: World Beyond. დელი აგრეთვე სერიალის სცენარს დაწერს.

სხვა მხრივ, მომავალ სერიალზე მაინცდამაინც ბევრი დეტალი არ ვიცით. თუმცა, რადგან ეკრანიზაცია ამჯერად ანიმაცია იქნება, შეგვიძლია ვივარაუდოთ, რომ ის ფენტეზი ამბავს უფრო საფუძვლიანად გააცოცხლებს ეკრანზე. ამავეს ფიქრობს მეიერიც.

"ძალიან მიხარია, რომ ნეტფლიქსის არაჩვეულებრივ ხალხთან თანამშრომლობის და ბინდის სამყაროს 'ლაივ-ექშენის' შეზღუდვების გარეშე გაცოცხლების შესაძლებლობა მოგვეცა", — წერს მეიერი თავის განახლებულ ვებსაიტზე, — "მგონი, შევძლებთ, რაღაც მშვენიერი შევქმნათ. მაგრამ ეს ხომ ანიმაციაა, ასე რომ, ყველას, მათ შორის, მეც, მოთმინება გვმართებს. ჩვენთვის სასურველი შედეგის მისაღებად დროა საჭირო".

• 10 საინტერესო ფაქტი ბინდის საგის ავტორ სტეფანი მეიერზე

მეიერი კი მოთმინებისკენ მოგვიწოდებს, მაგრამ ჩვენი მოლოდინი ყოველ მორიგ სიახლეზე კიდევ უფრო მძაფრდება. მით უფრო, რომ ბინდი ერთადერთი ნაწარმოები არაა, რომელიც ახლო მომავალში ხელმეორედ გაცოცხლდება ეკრანზე. 2026 წელს Max-ზე (ყოფილი HBO Max) ჰარი პოტერის მასშტაბური სერიალი დაიწყება, ამასობაში კი, ბარბის რეჟისორი გრეტა გერვიგი ნარნიის ქრონიკების მიხედვით ორ ახალ ფილმს იღებს...

სტეფანი მეიერმა ბინდის საგის პირველი რომანი 2005 წელს გამოსცა. სერიის ოთხწიგნეული 37 ენაზე ითარგმნა და მსოფლიოში 100 მილიონზე მეტ ეგზემპლარად გაიყიდა, რამაც მწერალს $125-მილიონიანი შემოსავალი და თანამედროვეობის ერთ-ერთი ყველაზე აღიარებული ავტორის სახელი მოუტანა. საგის მიხედვით გადაღებულმა ხუთმა ფილმმა, სადაც მთავარი როლები რობერტ პატინსონმა, კრისტენ სტიუარტმა და ტეილორ ლოტნერმა შეასრულეს, მსოფლიოში ჯამურად $3,4 მილიარდზე მეტი გამოიმუშავა.

• ბინდის პერსონაჟები წიგნებში VS ფილმებში — 12 ფოტო

ოთხი წიგნისა (ბინდი, ახალი მთვარე, დაბნელება, განთიადი) და შუაღამის მზის გარდა, მეიერს გამოცემული აქვს საგის თანმხლები ნოველა ბრი ტენერის მოკლე მეორე სიცოცხლე, ბინდის ილუსტრირებული გზამკვლევი და რომანი სიცოცხლე და სიკვდილი, სადაც ყველა პერსონაჟს, მათ შორის, ბელასა და ედვარდს, გენდერი აქვს შეცვლილი.

2020 წელს მეიერმა ასევე განაცხადა, რომ ბინდის სამყაროსთან დაკავშირებული კიდევ ორი წიგნის დაწერას აპირებს.