რუსეთის ტერიტორიაზე დრონებით მორიგი თავდასხმა განხორციელდა — უპილოტო საფრენი აპარატების იერიშის შესახებ როსტოვის, ბრიანსკისა და ვორონეჟის ოლქებში აცხადებენ.

როსტოვის ოლქის გუბერნატორმა Telegram-არხზე დაწერა, რომ ოლქში 4 დრონი ჩამოაგდეს. ვრცელდება კადრები სადაც ჩანს, რომ კამენს-შახტინსკთან ნავთობბაზა იწვის. ამავე ოლქში, დრონების თავდასხმის შედეგად გაჩენილ ხანძარს პროლეტარსკის ნავთობბაზაზე უკვე 10 დღეა ვერ აქრობენ.

ბრიანსკის გუბერნატორმა აღნიშნა, რომ დრონების შეტევის შედეგად ოლქში 3 ადამიანი დაშავდა.

ვორონეჟის ოლქში აცხადებენ, რომ ჩამოგდებული დრონის ნაწილები ადვილად აფეთქებადი ობიექტის მახლობლად ჩამოვარდა, რის გამოც ორი სოფლის მოსახლეობის ევაკუაცია გახდა საჭირო. მოგვიანებით ისინი სახლებში დაბრუნდნენ.

რუსეთის თავდაცვის სამინისტროში ამტკიცებენ, რომ ვორონეჟთან 8, როსტოვთან კი 4 დრონი ჩამოაგდეს.