საკონსტიტუციო სასამართლოში რუსული კანონის განხილვის დროს პრეზიდენტის ერთ-ერთი წარმომადგენელი, სახალხო დამცველის ყოფილი მოადგილე გიორგი ბურჯანაძე იქნება — ინფორმაციას გიორგი ბურჯანაძე სოციალურ ქსელში თავად ავრცელებს.

"კონსტიტუციის დღეს გაუმარჯოს !

ამ კონსტიტუციითა და ბაფთით შემდეგ კვირას ვიქნები საქართველოს პრეზიდენტის ერთ-ერთი წარმომადგენელი საკონსტიტუციო სასამართლოში რუსული კანონის არაკონსტიტუციურობის საქმეზე.

მიხარია რომ საქართველოს ისტორიაში პრეზიდენტის პირველ სარჩელს წარმოვადგენ .
ამ შემოთავაზებისას წარსულ წყენაზე არ მიფიქრია, რადგან ისეთი საკითხია, სადაც ყველას ერთობა აუცილებელია. რუსული კანონის მიღება სახელმწიფოებრიობის გაუქმების ტოლფასია. ჩემთვის ეს საქმე არის — "საქართველო რუსეთის წინააღმდეგ".

როცა სახალხო დამცველის კონკურსში ვმონაწილეობდი, ამას სამსახურის შოვნის გამო არ ვაკეთებდი. მწამს ადამიანის უფლებების და დღევანდელ პირობებში, როდესაც საქართველოს სახალხო დამცველი სრულად უფუნქციოა, ორმაგ პასუხისმგებლობას ვგრძნობ რომ ვაწარმოო დავა ამ საკითხზე. თავის დროზე, რუსეთშიც კი ეს საკითხი იქაურმა სახალხო დამცველმა გაასაჩივრა. სამწუხაროდ ამან ესეც ვერ გაბედა.
ხშირად მეკითხებიან რისი იმედი მაქვს საკონსტიტუციო სასამართლოში დავისას. ზუსტი პასუხი არ მაქვს, მაგრამ ალბათ სასწაულის. მაგრამ მე ყველაფერს ვეცდები.
საკონსტიტუციო სასამართლოს ამ საქმეზე ჩვენი მოთხოვნის დაკმაყოფილებით შეუძლია ისტორია შექმნას, ქვეყანას და კონსტიტუციურ ორგანოებს სანქციები და პასუხისმგებლობა აარიდოს", — წერს ბურჯანაძე.

შეგახსენებთ, საკონსტიტუციო სასამართლოში რუსული კანონის განსახილველად სხდომა 29-31 აგვისტოს გაიმართება.

ცნობისთვის, საკონსტიტუციო სასამართლოში, რუსულ კანონთან დაკავშირებით სულ 4 სარჩელი შევიდა. სასამართლოს ცალ-ცალკე სარჩელებით მიმართეს პრეზიდენტმა, ქართულმა არასამთავრობო და მედია ორგანიზაციებმა, პარლამენტის ოპოზიციონერმა დეპუტატებმა და ჟურნალისტებმა.

აღსანიშნავია, რომ თითოეული ეს სარჩელი რუსული კანონის განსხვავებულ სამართლებრივ ასპექტებზე აპელირებს, რომლებიც მოსარჩელეების აზრით, წინააღმდეგობაში მოდის ქვეყნის ძირითად კანონთან.