20 აგვისტოს, ირანის მაღალჩინოსნებმა ირანში არსებული ბოლო გერმანული ენის შემსწავლელი ინსტიტუტი დახურეს, რომელიც გემანიის საელჩოს მხრიდან იყო აღიარებული.

პროირანული გამოცემა Mizanonline.ir აცხადებს, რომ ირანელმა მაღალჩინოსნებმა ინსტიტუტის ორი ცენტრის დახურვა მოითხოვეს, რომლებიც თეირანის სხვადასხვა რაიონებში იყო განლაგებული.

მათ ინსტიტუტის დახურვის არგუმენტად დაასახელეს ის, რომ "არალეგალური ცენტრი გერმანიის მთავრობასთან იყო დაახლოებული". ირანული მხარის თქმით, ამ ორგანიზაციამ "არ გაითვალისწინა ირანის კანონები, ჩაიდინა რამდენიმე არალეგალური ქმედება და აღმოაჩნდა მრავალი ფინანსური დარღვევები". სტატიაში ასევე წერია, რომ შესაძლოა მოხდეს გერმანიასთან დაახლოებული სხვა ინსტიტუტების დახურვაც.

AP-ის ცნობით, გადაწყვეტილების მიღების მიზეზი, 2023 წლის ივლისში, გერმანელი მაღალჩინოსნების მიერ ჰამბურგში არსებული ისლამური ცენტრის დახურვა გახდა. გერმანიამ ეს ინსტიტუტები ირანის თეოკრატიული იდეოლოგიის წახალისებასა და ლიბანის ჰეზბოლას სამხედრო ჯგუფის მხარდაჭერაში დაადანაშაულა.



რატომ დახურა გერმანიის მთავრობამ ისლამური დაწესებულებები

2023 წელს, გერმანიის შინაგან საქმეთა მინისტრმა, ნენსი ფესტერმა განაცხადა, რომ ჰამბურგში არსებულ ისლამურ ცენტრს დახურავდა, რადგან ისინი ახალისებდნენ ექსტრემიზმს.

"ჩემთვის მნიშვნელოვანია, რომ ყველასთვის გასაგები განცხადება გავაკეთო: ჩვენ არ ვმოქმედებთ რელიგიის საწინააღმდეგოდ", — განაცხადა ნენსი ფესტერმა.

გერმანულმა პოლიციამ ქვეყნის გარშემო 53 დაწესებულებაში ჩაატარა ჩხრეკა, მათ შორის ცნობილ იმამ ალის ანუ "ლურჯ მეჩეთში".

გერმანიის საგარეო საქმეთა მინისტრმა ბერლინში ირანის ელჩი გამოიძახა და მოუწოდა ირანის ახალ მთავრობას, რომ სასწრაფოდ განაახლონ სწავლა გერმანული ენის შემსწავლელ ინსტიტუტში.


ირანის პოზიცია 2023 წლის ივლისში

გასულ წელს, გერმანიაში დახურულ ისლამურ დაწესებულებებზე სასაუბროდ, ირანის საგარეო საქმეთა მინისტრმა გერმანიის ელჩი გამოიძახა. ხოლო, ირანის სამინისტრომ სოციალურ ქსელ X-ზე, მომხდარს "ისლამოფობიის მაგალითი" და გამოხატვის თავისუფლების დარღვევა უწოდა.

ცნობისთვის, 1995 წელს, ირანელმა მაღალჩინოსნებმა თეირანში გოეთეს ინსტიტუტი დახურეს, რომელიც გერმანული კულტურის, ენისა და განათლების სწავლებას ახალისებდა.