11 აგვისტოს, სამტრედიაში, პარტია ახალის ოფისის გახსნის შემდეგ, პარტიის ერთ-ერთ ლიდერს, ნიკა მელიას უცნობმა კაცმა სახის არეში დაზიანება მიაყენა.

შემთხვევა მაშინ მოხდა, როდესაც პარტიის თანათავმჯდომარე ჟურნალისტების კითხვებს პასუხობდა.

თავდამსხმელმა, დარტყმის მომენტიდან რამდენიმე წამში ტერიტორიის დატოვება სცადა, თუმცა მას ხელი პარტიის მხარდამჭერებმა შეუშალეს, მათ შორის მცირე დაპირისპირებაც მოხდა.

საბოლოოდ, თავდამსხმელმა მოპირდაპირე შენობაში შესვლა მოასწრო.

მომხდარ ფაქტს, კოალიცია ცვლილებებისთვის მალევე განცხადებით გამოეხმაურა.

განცხადებას უცვლელად გთავაზობთ:

"დღეს, სამტრედიაში მიპარვით და ლაჩრულად თავს დაესხნენ ჩვენი კოალიციის ლიდერს, ნიკა მელიას.

რაც არ უნდა ეცადოს ქართული ოცნება, დაუპირისპირდეს ჩვენი ხალხის ნებას და კვლავ მიიტაცოს ხელისუფლება, ჩვენი კოალიცია სრული პასუხისმგებლობით აცხადებს, რომ ივანიშვილი ამ არჩევნებს წააგებს და ხელისუფლების დამარცხება სამართლებრივად გაფორმდება არჩევნების შედეგებში. ვერანაირი თავდასხმებით თუ სხვა მცდელობებით ეს გარემოება ვერ შეიცვლება და ქართველი ხალხის ნების აღსრულება მხოლოდ დროის საკითხია - 26 ოქტომბერს “ქართული ოცნება” დაასრულებს თავის სამარცხვინო და ანტისახელმწიფოებრივ მმართველობას.

განსაკუთრებული ხაზგასმის ღირსია ის ფაქტი, რომ ხელისუფლების მიერ დაგეგმილი დანაშაულებრივი თავდასხმა დროში დაემთხვა აშშ-დან ვიზიტით ჩამოსული ჩვენი პარტნიორების დელეგაციის საქართველოში სტუმრობას. ამ ვიზიტის შემაჯამებელი პრესკონფერენცია იყო უმძიმესი განაჩენი ქართული ოცნებისთვის, რამაც კიდევ ერთხელ ცხადყო, რომ ივანიშვილი და ცივილიზებული სამყარო ერთმანეთთან შეუთავსებელია, რომ 26 ოქტომბერს არჩევანი დგას დემოკრატიულ ევროპულ საქართველოსა და რუსული სტილის ბანდიტურ-ოლიგარქიულ რეჟიმს შორის.

ქართული ოცნება არის დამარცხებული ძალა და 26 ოქტომბერს ჩანაცვლდება კოალიციური მმართველობით, რომელიც შექმნის თავისუფალ და სამართლიან გარემოს ყველასთვის და რამდენიმე წელიწადში შეიყვანს საქართველოს ევროკავშირში", — წერია განცხადებაში.

მეორე დღეს, ნიკა მელიამ თქვა, რომ ეს, მილევადი რეჟიმების საქციელია და 30 წლის მანძილზე ყველა ხელისუფალი [ძალაუფლების დაკარგვის მოლოდინში] ასე იქცეოდა.

12 აგვისტოს, საქართველოს პრემიერმა, ირაკლი კობახიძემ ჟურნალისტებთან საუბრისას განაცხადა, რომ ნებისმიერი ასეთი ქმედება მისთვის მიუღებელია, რადგან პირველ რიგში მმართველი ძალისთვისაა პრინციპულად მნიშვნელოვანი - არჩევნები ჩატარდეს მშვიდობიან და მშვიდ გარემოში.

პოლიტიკოსზე თავდასხმის ფაქტს, შსს ოფიციალური განცხადებით ჯერჯერობით არ გამოხმაურებია. როგორც NEWS.On.ge-ს შსს-ში განუცხადეს გამოძიება გამოძიება სსკ-ის 126-ე, ძალადობის მუხლით დაიწყო.