სახალხო დამცველთან არსებული რელიგიათა საბჭოს წევრები საქართველოს პარლამენტს მოუწოდებენ არ დაუშვან ადამიანის უფლებების დაცვის სტანდარტის გაუარესაბა და არ გადადგას ნაბიჯი რელიგიის თავისუფლების ხელყოფის სასარგებლოდ.

კერძოდ, საბჭოს წევრები ეხმაურებიან კონსტიტუციის ცვლილებების პროექტში გათვალისწინებულ იმ დებულებებს, რომლებიც რწმენის, სინდისის და აღმსარებლობის თავისუფლებას და მათ შეზღუდვას შეეხება.

მათი განცხადებით, კონსტიტუციის პროექტში წარმოდგენილი კრიტერიუმები რელიგიის თავისუფლების გაუმართლებელი შეზღუდვის საფრთხეს წარმოშობს:

"შეშფოთებას იწვევს ისეთი საფუძვლების დამატება, როგორებიცაა სახელმწიფო უსაფრთხოება, დანაშაულის თავიდან აცილება და მართლმსაჯულების განხორციელება. დასახელებული კრიტერიუმები არ არის განჭვრეტადი და წარმოშობს მაღალ რისკს, რომ მათი გამოყენება შესაძლოა არ ემსახურებოდეს ლეგიტიმურ და დემოკრატიული სახელმწიფოს არსებობისთვის აუცილებელ მიზნებს".

საბჭოს განცხადებით, ქვეყნის უზენაეს კანონში უფლების შეზღუდვის ბუნდოვანი და არაგანჭვრეტადი საფუძვლების დამატებით, შესაძლოა, ძირითადი კანონის, კონსტიტუციის საფუძველზე, რელიგიური გაერთიანებების უფლებათა არამართლზომიერ შეზღუდვას მიეცეს ლეგიტიმაცია:

"როდესაც ვსაუბრობთ რწმენისა და აღმსარებლობის კონსტიტუციით შეზღუდვის საფრთხეებზე, ვითვალისწინებთ იმ მრავალწლიან გამოწვევებსა და ბარიერებს, რომლებსაც რელიგიური გაერთიანებების დიდი ნაწილი ვაწყდებით საქართველოში. ჩვენ არაერთხელ გავმხდარვართ ჩვენი რწმენის გამოხატვის შეზღუდვის, ძალადობისა და შეუწყნარებელი დამოკიდებულების მსხვერპლნი".

რელიგიათა საბჭოს წევრების მოსაზრებით, კონსტიტუციის პროექტში წარმოდგენილი რელიგიის თავისუფლების შეზღუდვის საფუძვლებს არ უშვებს ადამიანის უფლებათა ევროპული კონვენცია, სამოქალაქო და პოლიტიკურ უფლებათა საერთაშორისო პაქტი და ევროპული კონსტიტუციების აბსოლუტური უმრავლესობა.

საქართველოს პარლამენტმა მეორე მოსმენით მიღებულ რედაქციაში, აღმსარებლობის თავისუფლების დაცვის მუხლს დაამატა და გააფართოვა დაცულ სფეროში ჩარევისა და შეზღუდვის საფუძვლები. თუკი მოქმედი კონსტიტუცია რელიგიის თავისუფლების შეზღუდვას მხოლოდ სხვათა უფლებების დასაცავად ითვალისწინებდა, წარმოდგენილ პროექტში მას დაემატა ისეთი საფუძვლები, როგორიცაა სახელმწიფო ან საზოგადოებრივი უსაფრთხოების უზრუნველყოფა, დანაშაულის თავიდან აცილება, ჯანმრთელობის დაცვა და მართლმსაჯულების განხორციელება.

სახალხო დამცველთან არსებული რელიგიათა საბჭოს წევრი გაერთიანებებია:

1. ლათინ კათოლიკეთა ამიერკავკასიის ადმინისტრაცია
2. სომეხთა სამოციქულო წმინდა მართლმადიდებელი ეკლესიის საქართველოს ეპარქია
3. ეზიდთა სასულიერო კრება
4. ევანგელურ-ლუთერული ეკლესია
5. სახარების რწმენის ეკლესია (ორმოცდაათიანლები)
6. ევანგელურ-ბაპტისტური ეკლესია
7. სომეხთა კათოლიკე ეკლესია
8. ქართველ მუსლიმთა კავშირი
9. სრულიად საქართველოს მუსლიმთა უმაღლესი სასულიერო სამმართველო
10. მეშვიდე დღის ქრისტიან ადვენტისტთა ეკლესია
11. ევანგელური ეკლესია სიცოცლის სიტყვა
12. ხსნის არმია
13. წმიდა სამების პროტესტანტული ეკლესია
14. ევანგელური ეკლესია ურყევი საფუძველი
15. სვედენბორგიანული საზოგადოება საქართველოში
16. მეგობართა საზოგადოება - კვაკერები
17. საქართველოს კრიშნას ცნობიერების საერთაშორისო საზოგადოება
18. დახსნილ ქრისტიანთა საღვთო ეკლესია
19. ქრისტიანულ-პროტესტანტული ეკლესია „ქრისტეს ეკლესია“