2024 წლის საბავშვო ევროვიზიის სიმღერის კონკურსზე საქართველოს ანდრია ფუტკარაძე წარადგენს. 11 წლის მომღერალმა საერთაშორისო ფესტივალზე ქვეყნის წარმომადგენლის სტატუსი საზოგადოებრივი მაუწყებლის პროექტ რანინას მეშვიდე სეზონში გამარჯვებით მოიპოვა.

ანდრია ბათუმში დაიბადა, სიმღერა კი ორი წლისას დაუწყია. ექვსი წლის ასაკიდან ანსამბლ ზღვის შვილების წევრია, ამასთან, ბათუმის ზაქარია ფალიაშვილის სახელობის მუსიკალურ ექვსწლედში სწავლობს ფორტეპიანოს განხრით.

ჯერჯერობით უცნობია, რა სიმღერას შეასრულებს ანდრია წლევანდელ ევროვიზია ჯუნიორზე, რომელსაც ესპანეთის დედაქალაქი მადრიდი უმასპინძლებს 16 ნოემბერს.

გასულ წელს, ნიცაში გამართულ საბავშვო ევროვიზიაზე გამარჯვება ისევ საფრანგეთს ხვდა წილად: ზედიზედ მეორედ, ჯამში კი — მესამედ. როგორც წესი, მომდევნო წლის კონკურსის მასპინძლობას სწორედ გამარჯვებულ ქვეყანას სთავაზობენ, მაგრამ საფრანგეთმა, სადაც საბავშვო ევროვიზია 2021-შიც ჩატარდა, ამჯერად ეს უფლება მეორეადგილოსან ესპანეთს დაუთმო.

საქართველო კი, უკვე საფრანგეთთან ერთად, საბავშვო ევროვიზიის რეკორდსმენ ქვეყნად რჩება სამი გამარჯვებით. 2008 წელს პირველი გამარჯვება ჯერ ჯგუფმა ბზიკებმა მოიპოვა, 2011 წელს პირველადგილოსანი გახდა ჯგუფი ქენდი, 2016 წელს მალტაზე გამართული კონკურსი კი მარიამ მამადაშვილმა მოიგო. ამას გარდა, საქართველომ ევროვიზია ჯუნიორზე ორჯერ დაიკავა მეორე ადგილი და ხუთჯერ მოხვდა საუკეთესო ხუთეულში.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...