ნიკოლას მადურო ვენესუელის პრეზიდენტად მესამე ვადით აირჩიეს.

ვენესუელის ეროვნული საარჩევნო საბჭოს ხელმძღვანელმა, ელვის ამოროსომ განაცხადა, რომ გაერთიანებული სოციალისტური პარტიის ლიდერმა, მადურომ, ხმების 51% მიიღო.

მადუროს შეფასებით, მისი ხელახალი არჩევა არის "სიმშვიდისა და სტაბილურობის ტრიუმფი" და, ასევე, თქვა, რომ ვენესუელის საარჩევნო სისტემა არის გამჭვირვალე.

შედეგებს არ აღიარებს ვენესუელის ოპოზიცია და ამბობს, რომ არჩევნები გაყალბდა. მადუროს ოპონენტი, ედმუნდო გონსალესი, რომელმაც, ოფიციალური მონაცემებით, ხმების 44 პროცენტი აიღო, აცხადებს, რომ გაყალბების შესახებ იციან "ვენესუელელებმა და მთელმა მსოფლიომ".

28 ივლისს გამართულ არჩევნებში, დაახლოებით, 21 მილიონმა ადამიანმა მიიღო მონაწილეობა.

საარჩევნო კომისიას, რომელსაც მადუროს ერთგული პირები აკონტროლებენ, ქვეყნის მასშტაბით 30 ათასი საარჩევნო უბნიდან ოფიციალური მონაცემები ამ დრომდე არ გამოუქვეყნებია, ეს კი ოპოზიციისთვის შედეგებთან ბრძოლას ართულებს.

შეერთებული შტატების სახელმწიფო მდივანი ენტონი ბლინკენი მოუწოდებს ვენესუელის საარჩევნო ხელისუფლებას, გამოაქვეყნონ დეტალური მონაცემები, რათა უზრუნველყოფილი იყოს შედეგების გამჭვირვალობა.

ოფიციალური შედეგების გამოქვეყნებიდან მალევე, ბლინკენმა თქვა, რომ აშშ-ს აქვს "სერიოზული ეჭვი, რომ გამოცხადებული შედეგი არ ასახავს ვენესუელელი ხალხის ნებას, ან შედეგებს".

რუსეთის პრეზიდენტმა ვლადიმირ პუტინმა ნიკოლას მადუროს ვენესუელის პრეზიდენტად ხელახალი არჩევა უკვე მიულოცა და განაცხადა, რომ მოსკოვს აქვს სტრატეგიული პარტნიორობა ვენესუელასთან.

ვენესუელა ერთ-ერთია იმ 5 ქვეყანას შორის, რომელმაც საქართველოს ოკუპირებული ტერიტორიები დამოუკიდებელ რესპუბლიკებად აღიარა. ამ ორი ე.წ. სახელმწიფოს დამოუკიდებლობას, ვენესუელის გარდა, მხოლოდ რუსეთი, ნიკარაგუა, სირია და ნაურუ აღიარებენ.

2019 წელს, როდესაც მადურომ მეორე ვადით გაიმარჯვა საპრეზიდენტო არჩევნებში, ინაუგურაციის ცერემონიალს დაესწრნენ ოკუპირებული ცხინვალისა და აფხაზეთის ე.წ. პრეზიდენტები. საქართველოს ხელისუფლებამ მაშინ მადუროს ახალი მანდატის ლეგიტიმურობა არ ცნო.