გიფიქრია, როგორი იქნებოდა დრამებით, სასიყვარულო ინტრიგებითა და კომიკური სცენებით სავსე რეალითი შოუ შუა საუკუნეებში? ამის წარმოდგენა მალე ალბათ აღარ გაგიჭირდება, რადგან ნეტფლიქსზე ახალი შავი კომედია, დეკამერონი, იწყება.

ჯოვანი ბოკაჩოს ამავე სახელწოდების კრებულის მიხედვით გადაღებული სერიალი მე-14 საუკუნეში, შავი ჭირის მძვინვარების პერიოდში, განვითარებულ მოვლენებზე გვიყვება. 1348 წელს ფლორენციელი დიდგვაროვნები თავიანთ მსახურებთან ერთად მიაშურებენ სოფლად მდგარ ვილა სანტას, რათა ეპიდემიის ჩაცხრობას იქ დაელოდონ. თუმცა, მზიან ტოსკანაში ღვინითა და სექსით განებივრებული ახალმობინადრეები მალე ხვდებიან, რომ გადარჩენისთვის უნდა იბრძოლონ.

ნეტფლიქსის დეკამერონის შემქმნელი კეთლინ ჯორდანია, სერიალში მთავარ როლებს კი ზოშა მემითი, სირშა-მონიკა ჯექსონი, ტანია რეინოლდსი და ტონი ჰეილი ასრულებენ.

ბოკაჩოს დეკამერონი იტალიური ლიტერატურის შედევრად და ერთ-ერთ ყველაზე გავლენიან წიგნად მიიჩნევა. მოზაიკური ნაწარმოები ვილას თავშეფარებული შვიდი ქალისა და სამი კაცის მიერ მოყოლილ 100 ამბავს აერთიანებს. წიგნის შთაგონებით შექმნილა სპექტაკლები, ლექსები, სიმღერები, ოპერები, ფილმები და სერიალები. ლიტერატურულ ღირებულებასთან ერთად, დეკამერონს ისტორიული მნიშვნელობაც გამოარჩევს, რადგან შუა საუკუნეების ცხოვრებასა და შავი ჭირის პერიპეტიებზე გვიყვება.

აი, სერიალის შემქმნელი კეთლინ ჯორდანი კი ამბობს, რომ ყველაზე მეტად ნაწარმოებში წამოჭრილმა კლასობრივი უთანასწორობის თემამ დააინტერესა.

"კრიზისულ პერიოდებში მდიდრებსა და ღარიბებს შორის ნაპრალი კიდევ უფრო ფართოვდება ხოლმე", — აღნიშნავს ჯორდანი, — "ეს, რა თქმა უნდა, საკუთარი თვალითაც ვიხილეთ ბოლო წლებში, განსაკუთრებით, კოვიდპანდემიის პერიოდში".

დეკამერონის რვავე ეპიზოდი ნეტფლიქსზე 25 ივლისს გამოვა.

ასევე იხილეთ:

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…