საყვარელი ადგილების, შენობებისა, პარკებისა თუ სკვერების ჩანაცვლება ახალი და გრანდიოზული პროექტებით, მხოლოდ ქართული და თბილისური მოვლენა არ არის. ასეთები სხვაგანაც ხდება და იმ ქალაქისა და ქვეყნების მაცხოვრებლებსაც უწევთ აქციების ან პერფორმანსების გამართვა.

სწორედ ასეთ პრობლემას შეეჩეხენ მელბურნის ერთ-ერთი ბოულინგ კლუბის წევრები. ქალაქის საბჭომ გადაწყვიტა, რომ ის შენობა, რომელშიც მათი საყვარელი კლუბია გახსნილი, დაანგრიოს და მის ნაცვლად ახალი სტადიონი ააგოს.

კლუბის წევრების უმეტესობა მოხუცები არიან და ისინი აქ 60 წლის განმავლობაში იკრიბებიან და თამაშობენ.

შენობის გადასარჩენად და ხალხის ყურადღების ამ პრობლემისკენ მისამართად კლუბის სამმა წევრმა, ტერი ფოსტერმა, ჯეინ ჰოლსმა და უინ ჰიუიტმა ბიონსეს Single Ladies ახალი ვერსია ჩაწერეს და კლიპიც გადაიღეს.

სიმღერაში ქალები ბოულინგის მიმართ თავიანთი სიყვარულის შესახებ მოგვითხრობენ და ქალაქის საბჭოს მოუწოდებენ, არ დაანგრიონ შენობა, რომელშიც მათ მთელი ცხოვრება აქვთ გატარებული.

ვიდეო უკვე 700 ათასზე მეტმა ადამიანმა ნახა. ჯერჯერობით უცნობია, რა ეფექტი ექნება ამ პერფორმანსს საბჭოს გადაწყვეტილებაზე.