პარტია საქართველოსთვის აცხადებს, რომ 2024 წლის საპარლამენტო არჩევნებს საქართველოს ხელისუფლება რუსეთის დახმარებით ჩაატარებს.

"ოქტომბრის არჩევნები არ იქნება ჩვეულებრივი არჩევნები. ამ არჩევნებზე გადაწყდება არამხოლოდ ევროპული მომავლის დაცვის, არამედ სუვერენიტეტის და ტერიტორიული მთლიანობის დაცვის საკითხი", — ნათქვამია პარტიის განცხადებაში.

პარტია წერს, რომ რუსეთის დაზვერვის განცხადება, რომლის მიხედვით, არჩევნების შემდეგ ძალაუფლების შეცვლა აშშ-ს აქვს გადაწყვეტილი, არჩევნებში ჩარევის და მის გაყალბებაში ოცნების დახმარების პირდაპირი მცდელობაა, რასაც აუცილებლად ექნება გაგრძელება:

"გაყალბების და ამომრჩეველზე ზეგავლენის მთავარ ინსტრუმენტს რუსული სტილის პროპაგანდა წარმოადგენს, რომლის თანახმად, დასავლეთი არჩევნებში ჩარევას და რევოლუციას გეგმავს. აღნიშნულ სიყალბეს, რომელიც სინამდვილეში არჩევნებში რუსეთის ჩარევის გადასაფარად არის გამოგონილი, აქტიურად ავრცელებენ სამთავრობო პროპაგანდისტული არხები".

პარტიის განცხადებით, ოცნების უმაღლესი თანამდებობის პირები დასავლეთს ქვეყნის სუვერენიტეტის მტრობაში ადანაშაულებენ, ხოლო რუსეთს სუვერენიტეტის გარანტად მოიხსენიებენ მაშინ, როცა დასავლეთი 30 წელია საქართველოს სუვერენიტეტს იცავს რუსეთისგან, რომელსაც საქართველოს ტერიტორიების 20% აქვს ოკუპირებული.

"არჩევნებში რუსეთის ჩარევის კონტექსტში, არ უნდა დაგვავიწყდეს, რუსეთის აგენტობისთვის სანქცირებული და ამჟამად რუსეთში მყოფი, კრემლთან დაახლოებული, ყოფილი გენერალური პროკურორის გავლენები რიგ ძალოვან უწყებებზე, რომლებსაც კრიტიკული როლი აქვთ არჩევნების გაყალბებაში. ამ მხრივ საყურადღებოა სუსი-ს როლი, რომელმაც ყველაფერი გააკეთა რუსეთის აგენტის ქვეყნიდან გასაყვანად", — წერს პარტია საქართველოსთვის.