მოკლედ: ოპოზიციონერი დეპუტატი თეონა აქუბარდია წერს, რომ დღეს, 11 ივნისს, პარლამენტის პლენარულ სხდომაზე, 62-ზე მეტი დეპუტატი არ იყო, თუმცა, რეგისტრაციაზე პირველად 71, ხოლო მეორედ 73 დეპუტატი დაფიქსირდა.

  • "სესია ორჯერ მცდელობის მიუხედავად ვერ შედგა, რადგან მიუხედავად სხვისი პულტის გამოყენებისა 76 კაცი ვერ მოაგროვა ოცნებამ", — წერს აქუბარდია.

დეტალები: აქუბარდიას თქმით, პლენარული სხდომა დღეს, 15:00 საათისთვის გადაიდო: "ვნახოთ თუ მოიყვანს ოცნება თავის დეპუტატებს ახლა მაინც. ასეთი რამ ამ პარლამენტში ჯერ არ მახსოვს. სანქციების შემდეგ პირველი სესია ვერ გახსნეს".

კონტექსტი: დღეს, 11 ივნისს, საქართველოს პარლამენტის პლენარული სხდომა, რომელიც 12:00 საათზე იყო ჩანიშნული, კვორუმის არარსებობის გამო ვერ დაიწყო.

  • რეგისტრაცია დეპუტატებმა ორჯერ გაიარეს, თუმცა, კვორუმი არ შედგა.

  • პირველ ჯერზე რეგისტრაცია გაიარა 71-მა დეპუტატმა, ხოლო მეორედ — 73-მა.

  • იმისთვის, რომ პლენარული სხდომა უფლებამოსილი იყოს, რეგისტრაცია უნდა გაიაროს 76-მა დეპუტატმა.

ტელეკომპანია პირველის ინფორმაციით, ქართული ოცნებიდან სხდომას არ ესწრებოდნენ ვიქტორ ჯაფარიძე, დავით სონღულაშვილი, გიორგი სოსიაშვილი, სალომე ქურასბედიანი, გიორგი ბარვენაშვილი, კახა კახიშვილი, დიმიტრი სამხარაძე.

ბოლო ხაზი: მას შემდეგ, რაც ქართულმა ოცნებამ, მესამე მოსმენით რუსული კანონი მიიღო, ოპოზიციურმა პარტიებმა და დეპუტატებმა პარლამენტს და საკრებულოებს ბოიკოტი გამოუცხადეს.