რა ხდება: საქართველოს ახალგაზრდა იურისტთა ასოციაცია ეხმიანება იუსტიციის საბჭოს მიერ 21 მოსამართლის უვადოდ გამწესებას.

  • საია აცხადებს, რომ სადამკვირვებლო ორგანიზაციებისთვის მოულოდნელი იყო უვადოდ დასანიშნ მოსამართლეების კენჭისყრა, რადგან პროცედურა ითვალისწინებს სამწლიან გამოსაცდელ ვადაში მყოფ კანდიდატებთან გასაუბრებას.
  • არასამთავრობო ორგანიზაციის ინფორმაციით, ამ მოსამართლეებთან გასაუბრების შესახებ ინფორმაცია საბჭოს ვებგვერდზე არ გამოუქვეყნებია, შესაბამისად, უცნობია, ჩატარდა თუ არა საერთოდ გასაუბრებები და თუ ჩატარდა, რატომ არ მიეცა სადამკვირვებლო ორგანიზაციებს მონიტორინგის შესაძლებლობა.

დეტალები: საქართველოს ახალგაზრდა იურისტთა ასოციაციის განცხადებაში სხვა ბუნდოვანი საკითხების შესახებაც წერია.

კონკრეტულად:

  • იუსტიციის უმაღლესი საბჭოს 21 მაისის სხდომის დღის წესრიგი სულ ოთხ საკითხს ითვალისწინებდა.
  • სხდომის შესახებ ინფორმაცია და დღის წესრიგი კანონის დარღვევით და უკვე დადგენილი პრაქტიკის შესაბამისად, წინა დღეს გამოქვეყნდა ვებგვერდზე.
  • სხდომა 17 საათზე იყო დანიშნული და 2 საათის დაგვიანებით დაიწყო.
  • საბჭოს მდივნის ზეპირი განკარგულებით, სადამკვირვებლო ორგანიზაციებს წარმომადგენლებს შენობის ფოიეში მოცდის შესაძლებლობა აღარ ეძლევათ და დამამცირებელ პირობებში შენობის შესასვლელ კარებსა და ტურნიკეტს შორის უწევთ სხდომის დაწყების ლოდინი.

ამავე განცხადების მიხედვით, პირველი საკითხის ფარგლებში "ზოგიერთი მოსამართლის მივლინების შესახებ“, იუსტიციის უმაღლესმა საბჭომ ქუთაისის საქალაქო სასამართლოს სისხლის საქმეთა კოლეგიის მოსამართლე ქეთევან თხელიძე ორი კვირით მიავლინა ცაგერში — მდივანმა სხდომაზე თქვა, რომ ეს თხელიძის თანხმობით მოხდა.

  • საია წერს, რომ ქეთევან თხელიძე აქამდეც არაერთხელ მიუვლენია საბჭოს.

ასევე, მე-2 და მე-3 საკითხები მოიხსნა დღის წესრიგიდან.

"მე-4 საორგანიზაციო საკითხი, რომელიც ბუნდოვანი იყო, როგორც მდივანმა სხდომაზე განმარტა მოიცავდა უზენაესი სასამართლოს კონკურსში მონაწილე კანდიდატების შემდგომ ეტაპზე გადაყვანის პროცედურას და ასევე, სამწლიან გამოსაცდელ ვადაში მყოფი მოსამართლეების უვადოდ გამწესებას", — წერს საია.

მათივე ცნობით, უზენაესი სასამართლოს პარლამენტისათვის წარსადგენ კანდიდატთა შერჩევის კონკურსში უმაღლესი ქულები დააგროვა - ბადრი შონიამ, გოჩა ჯეირანაშვილმა და გიზო უბილავამ.

შესაბამისად, შემდგომ ეტაპზე გადავიდა სწორედ ეს სამი კანდიდატი.

  • ამ პროცესში მონაწილე კანდიდატებს უფლება აქვთ ეს განკარგულება გაასაჩივრონ უზენაესი სასამართლოს საკვალიფიკაციო პალატაში.
  • გასაჩივრების ვადების ამოწურვის შემდეგ, საუკეთესო შედეგების მქონე კანდიდატებს ღია სხდომაზე, სათითაოდ ეყრება კენჭი და პარლამენტს წარედგინება ის სამი კანდიდატი, რომელსაც იუსტიციის უმაღლესი საბჭოს სრული შემადგენლობის არანაკლებ ორი მესამედი დაუჭერს მხარს.