რა ხდება: ბრიუსელში უკრაინის ევროკავშირში გაწევრიანებასთან დაკავშირებით მოლაპარაკებების დაწყებას ივნისიდან ითხოვენ.

• ამის შესახებ პოლიტიკო საკუთარ წყაროებზე დაყრდნობით წერს.

დეტალები: დიპლომატები ევროკავშირიდან და კიევიდან ინტენსიურად მუშაობენ, რათა დაარწმუნონ უნგრეთის მთავრობა, დათანხმდეს უკრაინის გაწევრიანებაზე მოლაპარაკებების დაწყებას.

• ხუთმა დიპლომატმა, რომელიც გამოცემას ანონიმურობის პირობით ესაუბრა, თქვა, რომ მიზანია, ოფიციალური მოლაპარაკებები 25 ივნისს დაიწყოს.
• მოლაპარაკებების გახსნა გაამხნევებს უკრაინას, რომელიც ორ წელზე მეტია ებრძვის რუსეთის სრულმასშტაბიან შეჭრას და დიდი ხანია ისწრაფვის დასავლურ ბლოკში გაწევრიანებისკენ.

ევროკავშირის ლიდერებმა გასული წლის დეკემბერში უთხრეს უკრაინის პრეზიდენტ ვოლოდიმირ ზელენსკის, რომ მათ სურდათ, უკრაინა და მოლდოვა შეერთებოდნენ მათ ერთობას. მაგრამ გაწევრიანების მოლაპარაკებების დაწყების ოფიციალური სამართლებრივი პროცედურა უნგრეთმა შეაჩერა.

• დიპლომატების თქმით, ბრიუსელიც და კიევიც ბუდაპეშტთან ინტენსიურ ორმხრივ დიპლომატიაშია ჩართული, უკრაინაში უნგრული უმცირესობების შესახებ შეშფოთების მოსაგვარებლად.
• აპრილში უკრაინის პრეზიდენტის აპარატის ხელმძღვანელს ანდრეი ერმაკსა და უნგრეთის საგარეო საქმეთა მინისტრს პეტერ სიიარტოს შორის გამართული მოლაპარაკებების შემდეგ, "მხარეებმა აღნიშნეს დიალოგის პოზიტიური დინამიკა", აღნიშნულია უკრაინის დასკვნაში.

ერთმა დიპლომატმა ივარაუდა, რომ უნგრეთს, შესაძლოა, სურდეს უკრაინის გაწევრიანებასთან დაკავშირებული მოლაპარაკებების თავიდან აცილება მანამ, სანამ ივლისში ევროკავშირის საბჭოს 6-თვიან როტაციულ თავმჯდომარეობას აიღებს.

• მას შემდეგ, რაც ევროკავშირის ლიდერებმა უკრაინას კანდიდატის სტატუსი მიანიჭეს, გაწევრიანების პროცესში შემდეგი ნაბიჯი არის ოფიციალური მოლაპარაკებების დაწყება უკრაინასთან, სამთავრობათაშორისო კონფერენციის მეშვეობით. ეს ნიშნავს წევრობის მოლაპარაკებების გახსნას.
• იმისათვის, რომ ეს მოხდეს, ევროკავშირის ქვეყნებმა უნდა შეთანხმდნენ ე.წ. მოლაპარაკებების ჩარჩოზე.
• 27 ქვეყნის დედაქალაქი ამ დოკუმენტზე მარტიდან — დოკუმენტის მიღების შემდეგ მსჯელობს.
• ორი დიპლომატის თქმით, ტექნიკურ დონეზე მოლაპარაკებები, ჯერჯერობით, წარმატებით მიმდინარეობს.
• ისინი ელიან, რომ უახლოეს კვირებში ევროკავშირის ელჩებს გაეგზავნებათ ახალი პროექტი, რათა მათ შეძლონ ყველაზე მწვავე საკითხების გადაჭრა.

უკრაინა და მისი მხარდამჭერები ევროკავშირში, ითხოვენ ბრიუსელსა და კიევს შორის მთავრობათაშორისი კონფერენცია ჩატარდეს მანამდე, ვიდრე უნგრეთი დაიკავებს ევროკავშირის საბჭოს როტაციულ თავმჯდომარეობას. ეს კი 1 ივლისს მოხდება.

• უკრაინა-ევროკავშირის ურთიერთობებში ყველაზე დიდი დაბრკოლება, ბოლო წლების განმავლობაში, არის უნგრეთის პრემიერ-მინისტრი ვიქტორ ორბანი. ის რამდენჯერმე დაემუქრა კიევს, ევროკავშირის დაფინანსებების შესახებ გადაწყვეტილებების და გაწევრიანების მოლაპარაკებების დაბლოკვით.
• სანამ მოლაპარაკებების ჩარჩოზე დათანხმდება, ბუდაპეშტს მეტი გარანტია სურს უკრაინაში უმცირესობების სამართლებრივი დაცვის გაუმჯობესების შესახებ.