მოკლედ: დღეს, 13 მაისს, რუსული კანონის საპროტესტო აქციაზე დაკავებული ერთ-ერთი დემონსტრანტი, გურამ ადამია, იზოლატორიდან კლინიკაში გადაიყვანეს.

  • ინფორმაცია On.ge-ის დაუდასტურა ადამიანის უფლებათა ცენტრის იურისტმა ეკა ქობესაშვილმა.

დეტალები: ეკა კობესაშვილი On.ge-ის უყვება, რომ ადამია შეუძლოდ გახდა დროებითი მოთავსების იზოლატორში და და აუცილებელი გახდა მისი სამოქალაქო ტიპის სამედიცინო დაწესებულებაში გადაყვანა.

  • "ადამია დაახლოებით შუადღისკენ გადაიყვანეს, იზოლატორში შესახლებიდან რამდენიმე საათში. პროცედურები იყო დასაცავი, თორემ მაშინვე იყო გადასაყვანი [კლინიკაში]".
  • ადვოკატის თქმით, ადამიას თავის და სხეულის სხვადასხვა არეში ფიზიკური დაზიანებები აღენიშნებოდა: "დაკავების მომენტში, მასზე მოხდა ანგარიშსწორება სამართალდამცავების მხრიდან".

კონტექსტი: დღეს, შინაგან საქმეთა სამინისტრომ, საქართველოს პარლამენტთან, რუსული კანონის საპროტესტო აქციის 20 მონაწილე დააკავა.

  • საპროტესტო აქციიდან, მედიასაშუალებებმა გაავრცელეს ვიდეო კადრები, სადაც ჩანს თუ როგორ უსწორდებიან სპეცრაზმელები მოქალაქეებს ფიზიკურად და აკავებენ.
  • პოლიციის მხრიდან, მოქალაქეთა მიმართ არასათანადო მოპყრობის ფაქტებზე, სახალხო დამცველმა, ლევან იოსელიანმაც განაცხადა. მან შინაგან საქმეთა სამინისტროს მოუწოდა იმოქმედოს კანონმდებლობის ფარგლებში.

გაიგე მეტი: DRI: აქციის მონაწილეთა მიმართ გამოყენებული ფიზიკური ანგარიშსწორება ვერ ჩაითვლება კანონიერ საპოლიციო ღონისძიებად