დიდუბის რაიონის გამგებელი, ირმა ზავრადაშვილი აცხადებს, რომ სამშენებლო კომპანია როიალ გრუპი, რომლის სამუშაოს შესრულებისას დღეს მუშა დაიღუპა, არაერთხელ და მათ შორის ორშაბათსაც გააფრთხილა მერიის ზედამხედველობის სამსახურმა, რომ უსაფრთხოების ნორმები მაქსიმალურად დაცული ყოფილიყო:

"მშენებლობას აწარმოებდა როიალ გრუპი. ამ მშენებლობაში შედის ისიც, რომ არსებული სახლების დემონტაჟი უნდა განეხორციელებინათ".

შრომის ინსპექტირების დეპარტამენტის ხელმძღვანელის, ელზა ჯგერენაიას თქმით, უხეშად იყო დარღვეული შენობის დემონტაჟის სტანდარტები და ზედამხედველობის სამსახურს ამაზე შესაბამისი რეაგირება ექნება:

"მუშახელი იქნება თუ სხვა პერსონალი, მათ ეს სამუშაოები უნდა შეასრულონ არა ხელით ან კუსტარული იარაღებით, არამედ, უნდა შეასრულონ შესაბამისი ინსტრუმენტებით, რომელიც, ამ დასანგრევი შენობის, ან კედლის სიმაღლის პროპორციული მანძილით იქნება დაშორებული."

დღეს, დიდუბეში სახლის დემონტაჟის დროს კიდევ ერთი მუშა გარდაიცვალა, ორი კი დაშავდა. შსს-მ გამოძიება სისხლის სამართლის კოდექსის 240-ე მუხლით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს.