დიდუბეში, სოხუმის ქუჩაზე კიდევ ერთი მუშა გარდაიცვალა. როგორც საზოგადოებრივი მაუწყებელი წერს, იტალიურ ეზოში ავარიული სახლის დემონტაჟის დროს კედელი ჩამოიშალა და მასში სამი მუშა მოჰყვა.

აღნიშნული ინფორმაცია On.ge-ის შინაგან საქმეთა სამინისტროში დაუდასტურეს. უწყებამ გამოძიება სისხლის სამართლის კოდექსის 240-ე მუხლით დაიწყო, რაც სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას გულისხმობს.

გუშინ 25 ივლისს, დიდ დიღომში, მშენებარე კორპუსიდან მუშა გადმოვარდა და ადგილზე დაიღუპა.

გასული რამდენიმე თვის განმავლობაში არაერთი მუშა დაირუპა სამუშაოს შესრულებისას, მათ შორის მარტში ბათუმში, აპრილის თვეში ჭიათურასა და თბილისში, შარტავას ქუჩაზე. მაისის თვეში კი, თბილისში, პოლიტკოვსკაიას ქუჩაზე მეცხრე სართულიდან მუშა გადმოვარდა და გარდაიცვალა. ამავე თვეში, ტყიბულში, მინდელის სახელობის შახტაში ოთხი ადამიანი ჩავარდა.