დღეს, 9 ივნისს, განათლების მინისტრს, ალექსანდრე ჯეჯელავასა და აუდიტორია 115-ს შორის დახურული შეხვედრა გაიმართა, რომელის დასრულების შემდეგაც სტუდენტური მოძრაობის ერთ-ერთმა წევრმა, ანა კამლაძემ On.ge-სთან საუბარში განმარტა, რომ მინისტრი აუდიტორია 115-ის კანონპროექტის მთავრობის სხდომაზე გატანას ორშაბათს გეგმავს:

"ასეთი რაღაც გვითხრა, რომ თუ ორშაბათს მოხერხდება გატანა მთავრობის სხდომაზე, გაგაგებინებთო. თუ ამის შემდეგ მთავრობის სხდომაზე გავა, ამასაც თავისთავად გაგაგებინებთო. და თუკი ასე არ მოხდება, მაშინ გპირდებით, რომ ამ პრობლემებზე მუშაობას თავს მაინც არ დავანებებ იმის გამო, რომ ჩემთვის მნიშვნელოვანია ისინი, ისევე როგორც თქვენთვისო".

კამლაძის თქმით, დღევანდელი შეხვედრა პრაქტიკულად წინა შეხვედრის გაგრძელება იყო, რომელზეც ერთხელ ისაუბრეს აუდიტორია 115-ის ყველა იმ მოთხოვნაზე, რის ირგვლივაც ისინი გაერთიანდნენ:

"მისი პირადი პოზიცია არის ის, რომ ყველაფერში გვეთანხმება ფუნდამენტურად, მაგრამ განხორციელების ვადები ჯერ კიდევ არ არის ბოლომდე დადგენილი, რადგანაც, როგორც თავად აღნიშნა, არის განათლების მინისტრი, თუმცა ერთპიროვნულ გადაწყვეტილებას ვერ მიიღებს და გუნდთან ერთად კონსულტაციები კიდევ უნდა გაიაროს".

აუდიტორია 115-ის მიერ შემუშავებული კანონპროექტი შემდეგს ცვლილებებს ითვალისწინებს:

  • რექტორის მოვალეობის შემსრულებელს აირჩევენ 6 თვის ვადით. მას რექტორის თანამდებობაზე კენჭისყრის უფლება არ ექნება.
  • უნივერსიტეტის აკადემიურ საბჭოში სტუდენტებს პირდაპირი წესით აირჩევენ ანუ მათ ჯერ თვითმმართველობის არჩევნებში მონაწილეობა აღარ მოუწევთ იმისთვის, რომ საბჭოს წევრები გახდნენ.
  • თვითმმართველობის დღევანდელი ინსტიტუტის ფუნქციონირება საერთოდ შეჩერდება და მისი ალტერნატივა შეიქმნება.

აუდიტორია 115-ის კანონპროექტის თანახმად, თვითმმართველობა არსებული სახით აღარ იარსებებს