მოკლედ: შსს ამბობს, რომ აქციებს საერთაშორისო სტანდარტებით შლიან.

  • შსს-ში კრიმინალური პოლიციის დეპარტამენტის დირექტორმა, ბრიფინგზე, მედიას აჩვენა ვიდეომასალა, სადაც სხვა ქვეყნების საპოლიციო ღონისძიებები ჩანს.
  • კუპატაძის მტკიცებით, პოლიციას საქართველოში ძალისთვის არ გადაუმეტებია.

დეტალები: მისივე თქმით:

ინსტრუქციები, რომელიც არეგულირებს შეკრება-მანიფესტაციების მართვას, სრულ შესაბამისობაშია ეუთო/ოდირის სახელმძღვანელო პრინციპებთან.

  • სპეცრაზმის წევრებს, დონორ ორგანიზაციებთან თანამშრომლობის ფარგლებში, სხვადასხვა საერთაშორისო სწავლებაში აქვთ მონაწილეობა მიღებული და ისინი გადამზადებულნი არიან საერთაშორისო სტანდარტების შესაბამისად.
  • მათ საერთაშორისო დონის სწავლებები გავლილი აქვთ, როგორც საქართველოში, ასევე, გერმანიაში, ბულგარეთში, ნიდერლანდებში, იტალიაში, საფრანგეთსა და თურქეთში.
  • საერთაშორისო სტანდარტისაა ეკიპირება და სპეცტექნიკაც

"აქვე მინდა აღვნიშნო, რომ ბოლო პერიოდში საქართველოში, კერძოდ თბილისში მიმდინარე შეკრება-მანიფესტაციები არაერთხელ გასცდა შეკრებისა და მანიფესტაციების შესახებ კანონმდებლობით მიღებულ ზომებს. ვნახეთ შტურმი საკანონმდებლო ორგანოზე, პიკეტირების მცდელობა პარლამენტზე და ასევე, ძალადობის არაერთი შემთხვევა სამართალდამცველების მისამართით.

  • ეს კადრები არა მარტო ქართული მედიის, არამედ მსოფლიო მედიის ყურადღების ცენტრში მოხვდა და ჩემი ევროპელი კოლეგებიც დამეთანხმებიან, რომ ეს იყო პროპორციული ძალა და საკმაოდ ლმობიერი ქმედებები, რაც ქართველმა სამართალდამცველებმა გამოიყენეს.
  • ვაფრთხილებთ აქციის ყველა მონაწილესა და ორგანიზატორს, იმ დროს როდესაც პოლიცია კანონის შესაბამისად დაიწყებს აქციის მონაწილეთა ძალადობრივი ქმედებების აღკვეთას, გამოყენებული იქნება მკაცრი ზომები, ისევე როგორც ამერიკის და ევროპის წამყვან ქვეყნებშია მიღებული", — თქვა კუპატაძემ.

ბოლო ხაზი: ხელისუფლებამ მშვიდობიანი აქციები, პარლამენტის მიმდებარე ტერიტორიაზე, არაერთხელ დაარბია.

  • მხუთავ აირს, ხშირ შემთხვევაში, ყოველგვარი გაფრთხილების გარეშე იყენებდნენ.
  • მედიასაშუალებებმა დააფიქსირეს არაერთი შემთხვევა, როდესაც სპეცრაზმის მონაწილეები განსაკუთრებული აგრესიით გამოირჩეოდნენ, აქციის მონაწილეების მიმართ.