რა ხდება: ვაკო ლობჟანიძე, კლინიკა ნიუ ჰოსპიტალსის ექიმი, ჟურნალისტებთან კომენტარისას აცხადებს, რომ 25 წლის კაცს, რომელსაც ჭრილობა აქვს თვალის არეში, ოპერაციული ჩარევა არ ესაჭიროება.

  • "თვალი გადარჩა", — თქვა მან და აღნიშნა, რომ მარჯვენა თვალის არეში მიყენებული ტრავმა "სერიოზულია".

დეტალები: ახალგაზრდა კაცმა დაზიანება მიიღო პარლამენტის გვერდით, 9 აპრილის ქუჩაზე, მას შემდეგ, რაც შსს-მ წინასწარი გაფრთხილების გარეშე გამოიყენა სპეციალური საშუალებები აქციის მონაწილეთა წინააღმდეგ.

  • ექიმის, ვაკო ლობჟანიძის თანახმად, 25 წლის კაცს სავარაუდოდ, ბლაგვი საგნისგან აქვს დაზიანება მიღებული.
  • ექიმი: "ზუსტად არ ვიცით. უთქვამს, რაღაც საგანი ჩამარტყესო. მე არ გამომიკითხავს, უბრალოდ, შევესწარი ამ ფაქტს. შეიძლება, რაღაც ნასროლიც იყოს."
  • დაშავებულის შესახებ მედია ავრცელებდა ცნობას, რომ ჭრილობის მიზეზი შესაძლოა, რეზინის ტყვია ყოფილიყო. მსგავსი დაზიანებები აღენიშნებოდა აქციის რამდენიმე მონაწილესაც სხეულის სხვადასხვა არეში.
  • შსს-მ განაცხადა, რომ მათ არ გამოუყენებიათ რეზინის ტყვიები დემონსტრანტების წინააღმდეგ.

ბოლო ხაზი: კლინიკა ნიუ ჰოსპიტალსშია მოთავსებული კიდევ ერთი პირი, რომელმაც დაზიანება მიიღო რუსული კანონის საწინააღმდეგო აქციისას. ექიმის, ვაკო ლობჟანიძის თანახმად, მას, ე.წ. წიწაკის სპრეის გამო, კანის გაღიზიანება აღენიშნება.

რა ვიცით აქციაზე დაშავებულთა შესახებ: რუსული კანონის საწინააღმდეგო აქციაზე 8 დაშავებულის ჰოსპიტალიზაცია გახდა საჭირო. ინფორმაციას ჯანდაცვის სამინისტრო ავრცელებს. უწყების ინფორმაციით, ერთი პირი კლინიკიდან უკვე გაწერეს. დაშავებულებს აღენიშნებათ სხვადასხვა სახის დაზიანებები, მათ შორის: ჭრილობები სახის, თავისა და სხეულის სხვადასხვა ნაწილზე, ასევე — ინტოქსიკაცია და სასუნთქი გზების გართულებები.

ფოტოებში: აქციაზე დაშავებული მშვიდობიანი დემონსტრანტები