მოკლედ: სოციალური სამართლიანობის ცენტრი (SJC) მიიჩნევს, რომ 18-19 აპრილს, რუსული კანონის საწინააღმდეგო აქციაზე დაკავებული ანდრო ჭელიძისთვის, პატიმრობის შეფარდება იყო დაუსაბუთებელი და მიზნად ისახავდა, რეპრესიული ფორმით აქციის მონაწილეების დაშინებასა და პროტესტის ჩახშობას.

რა მოხდა: SJC წერს, რომ საქართველოს პარლამენტთან, ანდრო ჭელიძე, პოლიციამ წვრილმანი ხულიგნობისა და პოლიციელის შეურაცხყოფის შაბლონური საფუძვლით დააკავა.

  • დაკავებისას და ძველი თბილისის I სამმართველოში გადაყვანისას, ამავე სამმართველოს თანამშრომლებმა, მასზე ფიზიკურად იძალადეს.
  • დაკავებული აქციის მიმდინარეობისას მხოლოდ რუსების მისამართით იგინებოდა, რაც, SJC-ის შეფასებით, სრულად ექცევა გამოხატვის თავისუფლებაში და არ წარმოადგენს სამართალდარღვევას.
  • აქციაზე ანდრო ჭელიძესთან ერთად დააკავეს ლუკა ირემაშვილი, რომელიც ცდილობდა, დაკავებულზე ძალადობა მობილურით გადაეღო.

SJC-ის მიხედვით, ვიდეო მტკიცებულებებში ჩანს, თუ როგორ ძალადობს ფიზიკურად ანდროზე რამდენიმე პოლიციელი.

  • წაქცეულ ანდრო ჭელიძეს ორი პოლიციელი ფეხებს ურტყამს, დანარჩენი სამართალდამცავები კი ფაქტს რეაგირების გარეშე უყურებენ.
  • ძალადობრივი დაკავების კადრები გაავრცელა ტელეკომპანია ფორმულამ.
  • SJC-ის მიხედვით, შსს ცალკეული თანამშრომლების მიერ, შესაძლო ძალადობის ფაქტზე, სპეციალურ საგამოძიებო სამსახურში დაწყებულია გამოძიება.

სოციალური სამართლიანობის ცენტრი წერს, რომ 19 აპრილს, მოსამართლე ირაკლი ჩიკაშუამ, მხოლოდ პოლიციელების ჩვენებების საფუძველზე, ანდრო ჭელიძეს ადმინისტრაციული პატიმრობა შეუფარდა:

  • "საქმეში არანაირი მყარი მტკიცებულება პოლიციას არ წარმოუდგენია, დაცვის მხარე კი ნათლად, მათ შორის მოწმეების ჩვენებით, ასაბუთებდა, რომ დაკავებულს სამართალდარღვევა არ ჩაუდენია".
  • SJC წერს, რომ თბილისის სააპელაციო სასამართლომ პატიმრობის შეფარდების შესახებ მათი საჩივარი დაუშვებლად ცნო.

ბოლო ხაზი: SJC-ის მიხედვით, ადამიანის უფლებათა ევროპული სასამართლოს დამკვიდრებული პრაქტიკით, ადმინისტრაციული პატიმრობა უკანონოა, როდესაც სასამართლო ვერ წარმოადგენს მკაფიო მიზეზებს პიროვნებისთვის პატიმრობის შესაფარდებლად.

  • ანდრო ჭელიძისთვის პატიმრობის შეფარდება ევროპული კონვენციის მე-5 მუხლით გარანტირებულ თავისუფლების უფლებას არღვევს მისი თვითნებური და არაპროპორციული ხასიათის გამო.