რა ხდება: სტუდენტ ნიკო მანაგაძეს რამდენიმე პირი დაესხა თავს თბილისის სახელმწიფო უნივერსიტეტთან. ის არის სტუდენტური მოძრაობის, თავისუფლებისთვის წევრი.

  • მანაგაძე იმყოფებოდა იმ სტუდენტთა შორის, რომლებიც პროტესტით დახვდნენ საქართველოს პრემიერ-მინისტრის, ირაკლი კობახიძის მისვლას თბილისის სახელმწიფო უნივერსიტეტში.
  • კობახიძე თსუ-ში ლექციის ჩასატარებლად მივიდა.
  • ასევე, ლექციაზე არ შეუშვეს სტუდენტი, რომელიც კობახიძის ლექციაზე საქართველოსა და ევროკავშირის დროშით მივიდა.
  • ჟურნალისტებმა ირაკლი კობახიძეს ჰკითხეს, უქმნის თუ არა უხერხულობას, რომ სტუდენტი მის ლექციაზე დროშების გამო არ დაუშვეს, რასაც პრემიერ-მინისტრმა კრიტიკულ მედიაზე სიტყვიერი შეტევით უპასუხა და თქვა, რომ "ჟურნალისტიკაში არ არის ტვ პირველის, მთავარისა და ნაცმოძრაობის ადგილი."
  • მანაგაძესთან დაკავშირებული ინციდენტი მას შემდეგ მოხდა, რაც პრემიერ-მინისტრმა, ლექციის დასრულების შემდეგ, შენობა დატოვა.

რას წერს მანაგაძე: სტუდენტმა ფეისბუქზე მონიშნა ირაკლი კობახიძე და მიმართა:

"გამარჯობა, ბატონო რუსეთის მონავ!

  • თუ ვინმეს ანეიტრალებ ამ მეთოდებით, მისამართი შეგეშალა.
  • მთელი ცხოვრება დაცვით და ზედ დამატებული 10-15 კაციანი ტიტუშკებით ვერ ივლი, აი მერე ვნახოთ სახის ალეწვა.
  • ზამბარას რაც უფრო გაწელავ, მით უფრო მწარედ მოგხვდება უკან. დადგება ეგ დღე.
  • ჩემს სახეზე ეს კვალი გაქრება, მაგრამ შენი სახიდან რუსეთის მონის და ჩმორის კვალი ვერ ჩამოირეცხება. ისტორია იმახსოვრებს მოღალატეებს."

კონტექსტი: ბოლო რამდენიმე დღეა, რაც საქართველოში ხალხი რუსული კანონის მიღებას აპროტესტებს, საკანონმდებლო ინიციატივის საპარლამენტო განხილვების პარალელურად.

  • აქციები არა მხოლოდ თბილისში, სხვა რეგიონებშიც იმართება.
    რუსული კანონის საწინააღმდეგო აქციებში აქტიურად არიან ჩართულები ახალგაზრდებიც.
  • ახალგაზრდების ორგანიზებით აქციები გაიმართა 18 და 19 აპრილსაც.