ინფორმაცია იმის შესახებ, რომ სოციალური მედიის პლატფორმაზე კონტენტის შემქმნელები დააკავეს, პირველად გასულ კვირას გაჩნდა. Meydan TV, დამოუკიდებელი აზერბაიჯანული საინფორმაციო გამოშვება, იტყობინება, რომ დაკავებულია, დაახლოებით, 10 ტიკტოკერი.

ამ ინფორმაციის გავრცელებისთანავე, შინაგან საქმეთა სამინისტრომ ადგილობრივ მედიას განუცხადა, რომ დაკავებულებს საზოგადოების უპატივცემულობა ედებათ ბრალად.

შინაგან საქმეთა სამინისტროს სპიკერმა ანარ გაფაროვმა განუცხადა OC Media-ს, რომ ხელისუფლებამ ბოლო სამი თვის განმავლობაში "ტიკტოკის" 60-ზე მეტი მომხმარებელი "დასაჯა".

"ზოგი დააკავეს, ზოგი დააჯარიმეს, ზოგთან კი პრევენციული საუბარი ჰქონდათ", — განაცხადა გაფაროვმა. "მაგრამ ჩვენ არ დაგვითვლია დაკავებულების და დაჯარიმებულების რაოდენობა, ამისი სტატისტიკა არ გვაქვს", — თქვა მან.

გაფაროვს არ უთქვამს, აზერბაიჯანის სისხლის სამართლის, ან ადმინისტრაციული სამართალდარღვევის კოდექსის რომელი მუხლებით არიან ტიკტოკერები ბრალდებული, მაგრამ განაცხადა, რომ დაკავებულებმა გამოავლინეს "საზოგადოების ღია უპატივცემულობა და მორალური ღირებულებების საწინააღმდეგოდ მოიქცნენ სოციალურ პლატფორმებზე, განსაკუთრებით, პირდაპირ ეთერში".

OC Media-მ დაკავებულებთან დაკავშირება ვერ შეძლო.

პოლიციის მიერ დაკავებულებისა და დაჯარიმებულების შორის იყვნენ — სამირ რამაზანოვი, რომელიც სოციალურ ქსელში იყენებს მომხმარებლის სახელს Semka, მას 2 მილიონი გამომწერი ჰყავს TikTok-ზე; ჯასარატ ჯავადოვი, სახელით Pajizni Cesi, 45000 გამომწერი; ამრაჰ მაჰარამოვი, ტიკტოკზე სახელით —Magerramoff9, თითქმის 150,000 გამომწერი და როვშან სულეიმანოვი, ცნობილი როგორც Roshka Rosh, 89000 გამომწერით.

პოლიციამ, ასევე, დააკავა სადიგ მირზაევი, ცხრა წლის ტიკტოკერის, ადემ მირზაევის მამა, მას 114 000 გამომწერი ჰყავს TikTok-ზე. მირზაევის ვიდეოები, რომელშიც მას სთხოვენ, შეაგინოს ადამიანებს, ვირუსულად გავრცელდა. ბავშვის მამა 30 დღით დააკავეს.

ჯავადოვი, რომელიც 30 დღით იყო დაკავებული, აქვეყნებდა კონტენტს, რომელიც ძირითადად ქალებთან გასაუბრებაზე იყო ორიენტირებული. ის ცნობილია აზერბაიჯანული ჟარგონის და უხამსი სიტყვების გამოყენებით, და იმით, რომ აგროვებს ფულს არაპრივილეგირებულთა და ჯანმრთელობის მძიმე მდგომარეობის მქონე ადამიანების დასახმარებლად.

სულეიმანოვი პოლიციაში დაიბარეს, სავარაუდოდ, TikTok-ზე ვიდეოს გამოქვეყნების გამო, სადაც ურთიერთობებსა და სექსუალობაზე საუბრობს.

ფარიზ ნამაზლიმ, აზერბაიჯანელმა ადამიანის უფლებათა დამცველმა, თქვა, რომ დაკავებები და გამოძახებები "ხალხის სიტყვის თავისუფლების აღკვეთას" ისახავს მიზნად და ამტკიცებს, რომ ბრალდებები, რომლითაც ტიკტოკერები დააკავეს, გაურკვეველი და ბუნდოვანი იყო.

"მანამდე, შინაგან საქმეთა სამინისტრო, ამა თუ იმ სიტუაციის თავიდან ასარიდებლად, აცხადებდა, რომ ზოგიერთი პირისთვის ადმინისტრაციულ პასუხისმგებლობა უნდა დაეკისრებინათ, მაგრამ არ დაუკონკრეტებია, ადმინისტრაციულ სამართალდარღვევათა კოდექსის რომელი მუხლით უნდა მისცემოდნენ პასუხისგებაში", — უთხრა ნამაზლიმ OC Media-ს.

"ვფიქრობ, ამ ადამიანებს პასუხისმგებლობა ეკისრებოდათ სრულიად განსხვავებული სტანდარტების შესაბამისად, ყველაფერი ხდება ხალხის სიტყვის თავისუფლების აღკვეთისა და მათი დაშინების მიზნით".

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.