რა ხდება: ლაზარე გრიგორიადისს 9-წლიანი პატიმრობა მიესაჯა.

  • განაჩენი რამდენიმე წუთის წინ გამოაცხადა მოსამართლემ.
  • განაჩენის გამოცხადებას ლაზარეც ესწრებოდა.

დეტალები: დასკვნითი სასამართლო სხდომა გრიგორიადისის საქმეზე 8 აპრილს გაიმართა, თუმცა მოსამართლემ განაჩენის გამოტანა გადადო.

  • მოსამართლემ, ზვიად შარაძემ მაშინ თქვა, რომ განაჩენის გამოცხადების დროსთან დაკავშირებით გადაწყვეტილებას "გონივრულ ვადაში მიიღებდა".
  • განაჩენის მოსასმენად სასამართლოში ლაზარე გრიგორიადისსაც დაიბარებენ.

ლაზარეს საქმის ქრონოლოგია: რუსული კანონის საწინააღმდეგო აქციის მონაწილე, ლაზარე გრიგორიადისი პოლიციამ 2023 წლის 29 მარტს დააკავა.

  • 31 მარტს სასამართლომ ლაზარე გრიგორიადის აღკვეთის ღონისძიების სახით პატიმრობა შეუფარდა.
  • 8 აპრილს გრიგორიადისისთვის პატიმრობის გირაოთი შეცვლის მოთხოვნა სააპელაციომ დაუშვებლად ცნო და ლაზარე პატიმრობაში დატოვა.
  • გამოძიების ვერსიით, გრიგორიადისმა პოლიციის თანამშრომლებს ქვები და ე.წ. მოლოტოვის კოქტეილები ესროლა, ასევე, ცეცხლი წაუკიდა შსს-ის კუთვნილ ავტომობილს.
  • დაკავებულს ბრალდება პოლიციელის ჯანმრთელობის ხელყოფისა და ცეცხლის წაკიდებით სხვისი ნივთის დაზიანების მუხლებით წარედგინა.
  • დანაშაული 7-დან 11 წლამდე პატიმრობას ითვალისწინებს.

2023 წლის 25 სექტემბერს ლაზარე გრიგორიადისს 2021 წელს მომხდარი ოჯახური ძალადობის საქმეზე 1 წლითა და 6 თვით თავისუფლების აღკვეთა მიუსაჯა. საუბარია მამის, ბექა გრიგორიადისის დაჭრაზე.

  • ამ თემაზე ლაზარეს მამას არაერთხელ უსაუბრია — ამბობდა, რომ შვილთან პრეტენზია არ აქვს.

"2 წლის წინანდელი საქმე გადმოიღეს თაროდან და მიუსაჯეს მისი აქტიურობის გამო. მე არასდროს მიჩივლია და არანაირი პრეტენზია არ მქონია, მაგრამ არანაირი შეღავათი არ გაუწევიათ. მოვედი, რომ მოსამართლისთვის მეთქვა — მე მაშინ ვიყავი უგონოდ მთვრალი და [ლაზარემ] კი არ დამაზიანა, უფრო დიდ უბედურებას დამაშორა" — თქვა ბექა გრიგორიადისმა ნეტგაზეთთან, 2023 წლის 25 სექტემბერს.