მოკლედ: ამერიკის ელჩის თქმით, აშშ-მა როგორც საჯაროდ, ასევე, მთავრობასთან პირად საუბრებში გამოთქვა სერიოზული შეშფოთება წარდგენილ კანონპროექტთან დაკავშირებით.

• "ჩვენ შეშფოთებული ვართ, რომ კანონპროექტი საქართველოს ევროპული გზიდან გადაახვევინებს და ასევე გვაწუხებს, რომ ის უარყოფით გავლენას იქონიებს ადგილობრივი სამოქალაქო საზოგადოებების შესაძლებლობაზე, აკეთონ თავიანთი საქმე, დაეხმარონ ქართველ ხალხს ყოველდღიურად", — თქვა რობინ დანიგანმა.

დეტალები: ამასთან, ელჩი ამბობს, რომ ეს შეშფოთება მხოლოდ აშშ-ს არ აქვს და საკუთარი კრიტიკული აზრი დააფიქსირეს ევროკავშირმა, ნატო-მ, ევროპულმა საბჭომ, ევროპარლამენტმა, ბევრმა ევროპულმა ქვეყანამ და პარლამენტმა, ასევე — გაერომ.

• დანიგანის თქმით, მათ გამოთქვეს შეშფოთება, რომ კანონპროექტი უარყოფითად აისახება საქართველოს ევროკავშირის წევრობის გზაზე.

როგორ ეხმარება საქართველოს აშშ: ამერიკის ელჩმა ისაუბრა იმ მნიშვნელოვან სამუშაოზეც, რომელიც საქართველოში მათი დახმარებით ხორციელდება.

მისი თქმით, აშშ, პარტნიორობითა და მეგობრობით, მჭიდროდ მუშაობდა საქართველოს მთავრობებთან და სამოქალაქო ორგანიზაციებთან 30 წელზე მეტი ხნის განმავლობაში, რათა განეხორციელებინა ექვსი მილიარდი დოლარის დახმარება.

• "რას ნიშნავს და როგორია ეს მეგობრობა და დახმარება? მეგობრები რასაც აკეთებენ, რომ მხარს უჭერენ მეგობრებს გაძლიერებაში, სწორედ ეს გავაკეთეთ. ჩვენმა დახმარებამ გააძლიერა საქართველოს თავდაცვითი ძალები, აღჭურვა საქართველოს სანაპირო დაცვა, რათა საქართველომ შეძლოს სუვერენული ტერიტორიის დაცვა და ასევე შეაკავოს შემდგომი აგრესია“, — განაცხადა ელჩმა.

ასევე, დანიგანის თქმით, ამერიკის საშუალებით:

• აშენდა საავადმყოფოები, სკოლები;
• მომზადდნენ ექიმები, მასწავლებლები, გადაუდებელი დახმარების თანამშრომლები.
• ამერიკის დახმარებით აშენდა დამოუკიდებელი საცხოვრებელი ცენტრები მთელი ქვეყნის მასშტაბით,შშმ პირების დასახმარებლად, რომ მათ შეძლონ დამოუკიდებლად ცხოვრება.
• აშშ-ს დახმარებითვე, მცირე ფერმერებს და მცირე მეწარმეებს მიეცათ სესხები.
• ახალგაზრდებს — პროფესიული განათლება.
• გაიხსნა ამერიკული ცენტრები, სადაც უფასოდ შეისწავლება ინგლისური ენა.
• ათასობით ქართველს მიეცა აშშ-ის სასწავლო პროგრამებში სწავლის შესაძლებლობა.

"თუ გექნებათ კანონპროექტი, რომელზეც თქვენი დასავლელი პარტნიორები და მეგობრები გეუბნებიან, რომ სერიოზული შეშფოთება აქვთ, მაგრამ ოკუპანტი მიესალმება მას, არის თუ არა ეს სასიკეთო თქვენი ქვეყნისთვის, ამაზე უნდა დასვათ კითხვა", — თქვა ელჩმა.

მისივე თქმით, ეს კანონპროექტი არ არის ამერიკული კანონმდებლობის მსგავსი.

• "აშშ მიესალმება ჩვენი სამოქალაქო ორგანიზაციების როლს და იმას, როგორ ეხმარებიან ისინი ჩვენს ქვეყანას. ჩვენი ქვეყანა კონკრეტულად მოითხოვს, რომ ორგანიზაციები და პირები, რომელთაც ფულს უხდიან უცხო ქვეყნის მთავრობისა და მათი ინტერესების ლობირებაში, იყვნენ დარეგისტრირებული. ეს ძალიან განსხვავებული კანონია. ამით, კიდევ ერთხელ მინდა, განვაცხადო, რომ აშშ საქართველოს, მისი ხალხისა და მთავრობის გვერდით დგას და მხარს უჭერს საქართველოს ევროპულ გზას“, — განაცხადა დანიგანმა.