ე.წ. ციანიდის საქმის ერთ-ერთი პროკურორი, ზვიად გუბელანი ამბობს, რომ მიტროპოლიტი პეტრე საქმეში დაინტერესებული მხარეა და მისი ჩვენებას სამართლებრივი მნიშვნელობა არ აქვს. ამის შესახებ გუბელანმა მიტროპოლიტ პეტრეს დაკითხვის შემდეგ განაცხადა.

პროკურორი აღნიშნავს, რომ მეუფე პეტრემ ბრალდებულ დეკანოზ გიორგი მამალაძეს ადვოკატი აუყვანა და მისი მთავარი ინტერესია დეკანოზი გამართლდეს.

"მოწმე გულწრფელად ცდილობდა დახმარებოდა ბრალდებულს და მისთვის სასარგებლო ჩვენება მიეცა. სხვადასხვა ფაქტობრივ გარემოებებზე საუბრობდა, თუმცა ყველა კითხვაზე მისი პასუხი იყო მხოლოდ შეფასება", - აღნიშნა პროკურორმა.

დეკანოზი გიორგი მამალაძე 2017 წლის 10 თებერვალს, თბილისის საერთაშორისო აეროპორტში დააკავეს. დეკანოზის დაკავების შესახებ ინფორმაცია პროკურატურამ 13 თებერვალს გაავრცელა. პროკურატურის ინფორმაციით, გიორგი მამალაძეს ციანიდის გამოყენებით პატრიარქის მდივანე-რეფერენტის, შორენა თეთრუაშვილის მკვლელობა ჰქონდა განზრახული.