რა ხდება: საქართველოს პრემიერ-მინისტრი ირაკლი კობახიძე აცხადებს, რომ საქართველოს აქვს "კარგი მონაცემები" კორუფციის სიმცირის თვალსაზრისით და, ამ პარამეტრით, საქართველო უსწრებს ევროკავშირის წევრობის ყველა კანდიდატ ქვეყანასა და ევროკავშირის წევრ 10-მდე ქვეყანას.

• ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებს განუცხადა.

დეტალები: კობახიძეს ჟურნალისტმა ჰკითხა, გახდა თუ არა ჯანდაცვის სისტემაში გამოვლენილი კორუფცია ზურაბ აზარაშვილის თანამდებობიდან წასვლის საფუძველი, რაზეც პრემიერ-მინისტრმა თქვა, რომ ყოფილი მინისტრის მიერ თანამდებობის დატოვებას კორუფციასთან კავშირი არ ჰქონია.

• როგორ მუშაობდა კორუფციული სქემა სასწრაფო დახმარების სამსახურში, პროკურატურის მტკიცებით

ირაკლი კობახიძის შეფასებით, კორუფციასთან ბრძოლა მთავრობის ერთ-ერთი უმთავრესი ამოცანაა და ამ თვალსაზრისით, ქვეყანას კარგი მონაცემები აქვს. ხოლო მიზანი — კორუფციის სრულად აღმოფხვრა, "ძალიან რთული ამოცანაა". მისივე თქმით, ხელისუფლებას აქვს "პოლიტიკური ნება", მიაღწიოს კორუფციის სრულად აღმოფხვრის მიზანს.

• "თავისთავად, ის ფაქტი, რომ ევროკავშირის წევრი დაახლოებით 20 ქვეყანა გვისწრებს, მეტყველებს იმაზე, რომ კიდევ ბევრია გასაკეთებელი, რათა ვებრძოლოთ და შევამციროთ კორუფცია ჩვენს ქვეყანაში.
• გვაქვს ძალიან ამბიციური მიზანი, რომ ევროპის სამეულში დავიკავოთ ადგილი კორუფციასთან ბრძოლის და კორუფციის სიმცირის თვალსაზრისით. შესაბამისად, ბევრი რამ არის გასაკეთებელი. [...] გპირდებით, უახლოესი ერთი წლის განმავლობაში თვისებრივი, ხელშესახები შედეგები გვექნება კორუფციის კიდევ უფრო მეტად შემცირების თვალსაზრისით", — თქვა მან.

რედაქციისგან: კორუფცია ივანიშვილის ჩრდილქვეშ? — მინიშნებები ანგარიშიდან

ფართო სურათში: 2023 წლის 31 იანვარს, საერთაშორისო გამჭვირვალობა — საქართველომ 2022 წლის კორუფციის აღქმის ინდექსი გამოაქვეყნა.

• TI-ის შეფასებით, საქართველოში მაღალი დონის კორუფცია კლეპტოკრატიის სახეს იღებს.

ეს ნიშნავს, რომ სახელმწიფოს მმართველები იყენებენ პოლიტიკურ ძალაუფლებას, რათა მიითვისონ ქვეყნის სიმდიდრე და ჩაახშონ ნებისმიერი კრიტიკული ხმა როგორც პოლიტიკურ ოპოზიციაში, ისე მედიასა და სამოქალაქო საზოგადოებაში, — განმარტავს ორგანიზაცია.

• ინდექსის შედეგის ანალიზში ნათქვამია, რომ საქართველოში იზრდება მაღალი დონის კორუფცია და ღრმავდება სახელმწიფო ინსტიტუციების მიტაცება.
• "ქართულმა ოცნებამ, რომლის მმართველად საყოველთაოდ მიიჩნევა საქართველოს უმდიდრესი ადამიანი და ყოფილი პრემიერმინისტრი, ბიძინა ივანიშვილი, მიიტაცა ძირითადი სახელმწიფო ინსტიტუციები, სასამართლო და სამართალდამცავი ორგანოები, რის გამოც უმაღლეს დონეზე ძალაუფლების ბოროტად გამოყენება ძირითადად დაუსჯელი რჩება", — ვკითხულობთ ორგანიზაციის თვალსაზრისში.

რეკომენდაციები, რომლებსაც გამჭვირვალობა საქართველო მთავრობას სთავაზობს ასეთია:

• დაიწყოს მაღალი დონის სავარაუდო კორუფციული შემთხვევების ეფექტური გამოძიება;
• გაძლიერდეს საზედამხედველო ინსტიტუციები, პირველ რიგში კი, პარლამენტის როლი;
• საშუალება მიეცეს მედიასა და არასამთავრობო ორგანიზაციებს უსაფრთხო გარემოში, თავისუფლად შეასრულონ მათი საზედამხედველო ფუნქცია;
• განვითარდეს კრიტიკული მედია და საგამოძიებო ჟურნალისტიკა, ხელი შეეწყოს არასამთავრობო სექტორს, ანტიკორუფციულ ორგანიზაციებს.

ბოლო ხაზი: ირაკლი კობახიძის დღევანდელი განცხადების პათოსი წინააღმდეგობაშია პერსონალურად მისსავე გაცხადებულ პოზიციასთან, შემოწმდეს მოსამართლეთა კეთილსინდისიერება, ევროკავშირის მოთხოვნის თანახმად. კობახიძეს ეთანხმებიან არამხოლოდ მმართველ გუნდში, არამედ სასამართლოშიც, გავლენიანი პირები.

• რა აჩუქა მამამ იუსტიციის უმაღლესი საბჭოს წევრს და რა მოხდებოდა კეთილსინდისიერების შემოწმების შემთხვევაში