ადამიანის უფლებათა დაცვის კომიტეტის თავჯდომარემ, ეკა ბესელიამ, თავის მოადგილესთან ერთად, სპეციალური განცხადება გააკეთა და განმარტა, რომ რუსთავი 2-ის დირექტორის, ნიკა გვარამიას მიერ საკონსტიტუციო სასამართლოს მისამართით გაკეთებული განცხადებები, სასამართლოს პოლიტიკურ პროცესებში ჩართვის მცდელობაა:

"ნიკა გვარამიას მიერ რამდენიმე დღის წინ გაკეთებული განცხადება, რომ სააპელაციო სასამართლოს ეშინია, რომ არ დაასწროს სააპელაციო სასამართლომ რაღაც გადაწყვეტილების მიღება, ეს იყო მისი მხრიდან პირდაპირი ტექსტი და აღიარება, როგორც ჩანს, რომ მისთვის არ არის ცნობილი, მოსალოდნელი გადაწყვეტილებების შესახებ".

ბესელიამ ასევე განმარტა, რომ საკონსტიტუციო სასამართლოს შესახებ კანონში ცვლილებების მიღება სასამართლოს ინსტიტუციური და მის მიმართ ნდობის გაძლიერებისკენ იყო მიმართული.

საკონსტიტუციო სასამართლოს მოსამართლემ, მერაბ ტურავამ რუსთავი 2-ის საქმის სარჩელების განხილვის მოთხოვნით პლენუმს, საკონსტიტუციო სასამართლოს შესახებ კანონში შეტანილი ცვლილებების შესაბამისად, 7 ივნისს, მიმართა.

აღნიშნული გადაწყვეტილების მიღების საშუალება მოსამართლეებს მას შემდეგ მიეცათ, რაც საკონსტიტუციო სასამართლოს შესახებ კანონში შევიდა ერთ-ერთი ცვლილება, რომლის მიხედვითაც, ერთ მოსამართლეს შეუძლია კოლეგიაში საქმის განხილვის ნებისმიერ ეტაპზე საქმე პლენუმს გადასცეს განსახილველად.