მოკლედ: წუხელ, 22 მარტის ღამეს რუსეთმა უკრაინაზე მასშტაბური შეტევა მოაწყო უკრაინაზე, სამიზნე ენერგეტიკული ინფრასტრუქტურის ობიექტები იყო, მათ შორის — დნეპროჰესი.

  • სადგურმა მუშაობა შეაჩერა.
  • ქვეყნის შვიდ რეგიონში ელექტროენერგია ავარიულად გაითიშა.

დეტალები: კიევმა დარტყმას უწოდა ბოლო დროის ყველაზე დიდი თავდასხმა.

ვოლოდიმირ ზელენსკის თქმით, თავდასხმა განხორციელდა ხარკოვის, ზაპოროჟიის, სუმის, პოლტავის, დნეპროპეტროვსკის, ოდესის, ხმელნიცკის, ვინნიცის და ივანო-ფრაკოვსკის ოლქებზე.

  • ზელენსკის თქმით, რუსმა სამხედროებმა, უკრაინის მიმართულებით, სხვადასხვა ტიპის 90-მდე რაკეტა და 60-ზე მეტი დრონი გაუშვეს.
  • უკრაინის საჰაერო ძალებმა განაცხადა, რომ 151 ობიექტიდან 92 ჩამოაგდეს.
  • უკრაინის ხელისუფლებისა და ენერგეტიკის სფეროს თანამშრომლების ინფორმაციით, ყველაზე დიდი ზიანი მიადგა ხარკოვის ინფრასტრუქტურას. ქალაქს ელექტროენერგიის მიწოდება შეწყვეტილი აქვს.
  • ზაპოროჟიეს ატომურ ელექტროსადგურზე სარაკეტო თავდასხმის დროს, სადგურის უკრაინის ერთიან ენერგოსისტემასთან დამაკავშირებელი ელექტროგადამცემი ხაზი გაითიშა.
  • "თუ შიდა ენერგეტიკულ ქსელთან ბოლო საკომუნიკაციო ხაზი გაითიშება, ზაპოროჟიეს ატომური ელექტროსადგური გაითიშება, უსაფრთხო ექსპლუატაციის პირობების სერიოზული დარღვევა იქნება", — თქვა ენერგოატომის ხელმძღვანელმა, პიოტრ კოტინმა.
  • მოგვიანებით, ენერგოატომმა გაავრცელა ინფორმაცია, რომ უკრაინელმა ენერგეტიკოსებმა ელექტროგადამცემი ხაზი აღადგინეს.

ბოლო ხაზი: რუსეთის ხელისუფლებას უკრაინაზე განხორციელებულ მასობრივ თავდასხმაზე კომენტარი ჯერ არ გაუკეთებია.