მოკლედ: საქართველოში მომუშავე 12 არასამთავრობო ორგანიზაცია ევროკომისარს, ოლივერ ვარჰეის მიმართავს თხოვნით, განიხილოს საქართველოს მიერ ევროკავშირის 9 რეკომენდაციების შესრულების შესახებ შუალედური შეფასების მომზადების შესაძლებლობა.

დეტალები: ორგანიზაციების მიხედვით, შუალედური შეფასების ანგარიშის მომზადება გაზრდის ხელისუფლების ანგარიშვალდებულების ხარისხს, რეფორმების პროცესის გამჭვირვალობას და ინკლუზიურობას.

  • "საჯაროდ ხელმისაწვდომი შუალედური შეფასება მნიშვნელოვნად შეუწყობდა ხელს რეფორმების პროცესის სწრაფად და ეფექტიანად წარმართვას", — წერია განცხადებაში.
  • ორგანიზაციები აღნიშნავენ, რომ 2023 წლის 23 ივნისს ევროკომისიის შუალედური ზეპირმა ანგარიშმა "ბიძგი მისცა ხელისუფლების მხრიდან გარკვეული ნაბიჯების გადადგმას". მათივე თქმით, შუალედური ანგარიში "მნიშვნელოვანი დამხმარე ინსტრუმენტი" აღმოჩნდა სამოქალაქო საზოგადოებისთვისაც რეკომენდაციების შესრულების ზედამხედველობის პროცესში.

ასევე, სამოქალაქო საზოგადოება აღნიშნავს, რომ მათ შეიმუშავეს დეტალური ხედვა, თუ როგორ უნდა შესრულდეს ეფექტიანად ევროკომისიის მიერ განსაზღვრული 9 ნაბიჯი, რათა ქვეყანა გადავიდეს ევროინტეგრაციის შემდგომ ეტაპზე:

  • "ხელმომწერი ორგანიზაციები გამოვთქვამთ მზადყოფნას აქტიური როლი შევასრულოთ და წვლილი შევიტანოთ საქართველოს ევროინტეგრაციისა და დემოკრატიული ტრანსფორმაციის გზაზე და ვიმუშაოთ იმისთვის, რომ საქართველოს მოსახლეობის უმრავლესობის ნება სრულად აისახოს სახელმწიფო პოლიტიკაში", — წერია განცხადებაში.

ხელმომწერი ორგანიზაციები არიან სამოქალაქო საზოგადოების ფონდი, საფარი დემოკრატიის კვლევის ინსტიტუტი (DRI), მმართველობის მონიტორინგის ცენტრი (GMC), საქართველოს რეფორმების ასოციაცია (GRASS), საქართველოს ახალგაზრდა იურისტთა ასოციაცია (GYLA), სოციალური სამართლიანობის ცენტრი, საქართველოს დემოკრატიული ინიციატივა (GDI), საქართველოს სასამართლოს გუშაგი, საქართველოს სტრატეგიისა და საერთაშორისო ურთიერთობების კვლევის ფონდი (GFSIS), სამართლიანი არჩევნები (ISFED), ინფორმაციის თავისუფლების განვითარების ინსტიტუტი (IDFI).