ყაბარდო-ბალყარეთის მცხოვრები მოითხოვს, რუსეთის ხელისუფლებამ გამოიძიოს 1940-იან წლებში იოსებ სტალინის მიერ ჩრდილოეთ კავკასიელების დეპორტაცია, როგორც დანაშაული.

ბალყარელმა ოლეგ კელემეტოვმა მოითხოვა, რომ რუსეთის საგამოძიებო კომიტეტმა გამოიკვლიოს საბჭოთა კავშირის თავდაცვის კომიტეტის მიერ მოსახლეობის დეპორტაცია, როგორც დანაშაული და ქვეყნის კონსტიტუციის დარღვევა.

კომერსანტი იტყობინება, რომ კელემეტოვს სურს დააკისროს სისხლის სამართლის პასუხისმგებლობა კონკრეტული საბჭოთა მაღალჩინოსნებს, დეპორტაციის თაობაზე. მათ ბრალს ძალაუფლების გადამეტებაში სდებს. ის ასახელებს სტალინს, ვიაჩესლავ მოლოტოვს, კლიმენტ ვოროშილოვს, გეორგი მალენკოვს, ლავრენტი ბერიას, ნიკოლაი ვოზნესენსკის და ლაზარ კაგანოვიჩს.

საბჭოთა კავშირმა 1940-იან წლებში ყარაჩაელების, ბალყარელების, ჩეჩნების, ინგუშებისა და ყალმუხების მთელი მოსახლეობა, ისევე როგორც კიდევ რამდენიმე სხვა ეთნიკური ჯგუფი, იძულებით გადაასახლა ცენტრალურ აზიაში.

კელემეტოვი ამტკიცებს, რომ იძულებითი დეპორტაციები არღვევდა საბჭოთა კავშირის კონსტიტუციას, რომელსაც უნდა დაეცვა მოქალაქეების უფლებები, განურჩევლად მათი ეროვნებისა და რასისა.

კელემეტოვის მამა 1944 წელს ყაზახეთში დეპორტირებულთა შორის იყო, თუმცა, როგორც კავკაზსკი უზელი წერს, კელემეტოვი გამოძიების შესახებ მოთხოვნას აყენებს "არა როგორც რეპრესირებული პირის შვილი, არამედ, როგორც მოქალაქე, რომელსაც სურს დაისაჯონ დამნაშავეები, კანონის დარღვევისთვის".

"დეპორტაცია ატარებდა რეპრესიულ ხასიათს ფიზიკური ძალადობის გამოყენებით, იყო სიცოცხლისა და ჯანმრთელობისთვის საფრთხის შემცველი და დაფიქსირებულია დეპორტირებულთა შორის სიკვდილის მასობრივი ეპიზოდები. ხელისუფლების წარმომადგენლების ძალადობრივი ქმედებები იყო ფართო და სისტემური, რაც მიუთითებს გენოციდის ნიშნებზე“, — ნათქვამია კელემეტოვის განცხადებაში, რომელიც მან საგამოძიებო კომიტეტს წარუდგინა.

კელემეტოვმა განაცხადა, რომ თუ საგამოძიებო კომიტეტი უარს იტყვის მის მოთხოვნაზე, ის მათ გადაწყვეტილებას სასამართლოსა და გენერალურ პროკურატურაში გაასაჩივრებს.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.