საქართველოში გაზი ყველა მომხმარებლისთვის გაძვირდა. ახალი ტარიფების შესახებ გადაწყვეტილება ენერგეტიკისა და წყალმომარაგების კომისიამ დღეს, 18 ივლისს გამართულ რამდენიმე სხდომაზე მიიღო.

სემეკის გადაწყვეტილებით, ყაზტრანსგაზ თბილისის, რომელიც გაზით თბილისს ამარაგებს, ზედა ზღვრული ტარიფი 50-დან 46 თეთრამდე შეუმცირა. ფასის შეცვლა არ ასახულა სააბონენტო ტარიფში, რადგან სახელმწიფო, მემორანდუმის ფარგლებში, მოხმარებული გაზის 5 თეთრს ფარავდა და მოსახლეობას 45 თეთრის გადახდა უწევდა. დღეს შეტანხილი ცვლილების გამო თბილისის მოსახლეობისთვის გაზის ტარიფი, გაიაფების ნაცვლად, გაიზარდა.

საქართველოს ენერგეტიკის მინისტრმა, მარიამ ვალიშვილიმა On.ge-ს განუცხადა, რომ სახელმწიფო მემორანდუმის ფარგლებში მოხმარებული გაზის დასაფარად აღარ გამოიყოფა.

"დადგენილი ტარიფიდან 5 თეთრის ჩამოკლება აღარ მოხდება, ანუ გაგრძელდება ზუსტად ის ტარიფი, რომელიც დღეს მარეგულირებელმა კომისიამ დაადგინა," - აღნიშნავს მინისტრის მოადგილე.

ტარიფები 20 ივლისიდან შემდეგნაირი იქნება:

  • შპს ყაზტრანსგაზ თბილისისთვის - 46,153 თეთრი;
  • შპს სოკარ ჯორჯია გაზი - 56,94 თეთრი;
  • სს საქორგგაზისთვის - 57,015 თეთრი ;

20 ივლისიდან თბილისის აბონენტებისთვის გაზის ტარიფი ნახევარ თეთრზე მეტით, ხოლო რეგიონებში 2-დან 5 თეთრამდე გაიზრდება. ახალი ტარიფებით თბილისის მოსახლეობა, რეგიონებთან შედარებით, გაზს 10 თეთრით იაფად იღებს.