რა ხდება: "საქართველოს რეგიონებში სულ უფრო იმატებს კორუფციის სავარაუდო შემთხვევები. თანამდებობის პირებთან და ბიძინა ივანიშვილთან დაკავშირებული კომპანიები მსხვილ კონტრაქტებს იღებენ სახელმწიფო შემსყიდველებისგან", — ნათქვამია ორგანიზაცია საერთაშორისო გამჭვირვალობა - საქართველოს (TI) მიერ, 2024 წლის 9 თებერვლის ანგარიშში, რომელიც "კორუფციის რუკას" გვამცნობს.

• "დოკუმენტში თავმოყრილია ის საეჭვო ტენდერები და გამარტვებული შესყიდვები, რომლებსაც ვიკვლევდით სხვადასხვა დროს და შესაბამის სახელმწიფო სტრუქტურებს ოფიციალურად მიმართავდით რეაგირებისთვის იმ სავარაუდო კორუფციის ფაქტებზე, რომლებიც ამ შესყიდვებში იკვეთებოდა", — აცხადებს ანგარიშის ავტორი ორგანიზაცია.

დეტალები: მათ მიერ გამოქვეყნებულ დოკუმენტში გვხვდება რამდენიმე კონკრეტული მაგალითი, როდესაც ბიძინა ივანიშვილთან დაკავშირებულმა პირებმა, ან მათმა კომპანიებმა, ასობით ათასი ლარი მიიღო ბიუჯეტიდან შესყიდვების სახით.

მაგალითად,

ბაკურიანში ბიძინა ივანიშვილის რეზიდენციის დაცვის უფროსის, რევაზ მუმლაძის კომპანიამ 2020 წელს სახელმწიფო შესყიდვებით 237 534 ლარი მიიღო.

• მუმლაძე არის სამცხე-ჯავახეთის პოლიციის დეპარტამენტის ყოფილი ხელმძღვანელი.

იმერეთში ბიძინა ივანიშვილის დის მულის ქმარმა, მურმან ტოგონიძემ 2014 წლიდან დღემდე 33 688 809 ლარის სახელმწიფო შესყიდვები მიიღო.

• TI: "2020 წლის ივნისში გამოქვეყნებულ ბლოგში ვწერდით, რომ მურმან ტოგონიძემ 2014 წლიდან გამოქვეყნების დღემდე 16 395 591 ლარის შესყიდვები მიიღო. ბოლო სამ წელიწადში მიღებული თანხა თითქმის გაორმაგდა."

ასპინძაში ბიძინა ივანიშვილთან დაკავშირებულმა კომპანიამ, რომელსაც ასპინძის სარაგბო ბაზა ეკუთვნის, 2016-2023 წლებში სახელმწიფო შესყიდვებით, ჯამში, 567 167 ლარი მიიღო.

აბასთუმანში ბიძინა ივანიშვილის დაგეგმილ პროექტებში ჩართული და იმავდროულად, ივანიშვილის პარტიის, ქართული ოცნების შემწირველის, დემეტრე თათეშვილის კომპანიამ 2018-2023 წლებში 363 385 030 ლარის შესყიდვები მიიღო.

• TI: "შპს არალის შესყიდვებზე ბლოგი 2021 წლის მაისში გამოვაქვეყნეთ და მაშინდელი მონაცემებით (2018-2021 წლებში) კომპანიას შესყიდვებით მიღებული ჰქონდა 125 454 712 ლარი, ანუ ბოლო ორ წელიწადში ამ კომპანიის შემოსავლებში სახელმწიფო შესყიდვების გზით 238 მილიონ ლარამდე შევიდა."
• დამატებით, TI აღნიშნავს, რომ შპს არალისთვის ბიუჯეტიდან გადარიცხული თანხა ათეულობით მილიონი ლარით გაიზარდა 2018 წლის აგვისტოდან, როცა კომპანიის მაშინდელმა მესაკუთრემ, ოთარ თათეშვილმა, აბასთუმანში ბიძინა ივანიშვილს საკუთარი სახლის ასაშენებლად 450 კვ.მ. მიწა მიჰყიდა: "თუ მანამდე 7 წლის განმავლობაში ტენდერებით ჯამურად, 51 585 275 ლარი ჰქონდა მიღებული, მომდევნო ოთხწელიწადნახევარში მოგებული ტენდერებით ხელშეკრულებები 260 მილიონ ლარამდე გაუფორმდა", — წერს საერთაშორისო გამჭვირვალობა-საქართველო.

სტრიქონებს შორის: ივანიშვილმა სამთავრობო გუნდში არსებული კორუფციის მაღალი რისკების შესახებ თავადვე ისაუბრა და პოლიტიკაში მესამედ მოსვლის ერთ-ერთ მიზეზადაც დაასახელა, როდესაც 2023 წლის 30 დეკემბერს, მისივე დაფუძნებული პარტიის საპატიო თავმჯდომარედ აირჩიეს:

• "ოპოზიციური კონტროლის არარსებობის პირობებში, კორუფციის რისკებიც მატულობს, რასაც საგანგებო დაზღვევა ესაჭიროება. ამ ყველაფერმა მიმაღებინა ჩემთვის არასასიამოვნო გადაწყვეტილება, შემოვბრუნდე პოლიტიკაში და დავიკავო მმართველი პარტიის საპატიო თავმჯდომარის თანამდებობა, რის შესახებაც ჩემს მიერ დაფუძნებული პარტიის ხელმძღვანელ გუნდს ცოტა ხნის წინ თავად მივმართე", — განაცხადა ივანიშვილმა. [გაიგე მეტი]

ფართო სურათში: ორგანიზაცია საერთაშორისო გამჭვირვალობა-საქართველოს სიაში ასევე არიან როგორც პარლამენტის დეპუტატები, ასევე, თანამდებობის სხვა მოქმედი და ყოფილი პირები. მათ შორის, ვიქტორ ჯაფარიძე, რომელიც ანტიდასავლური ხალხის ძალის ერთ-ერთი ლიდერი და სამთავრობო-პროპაგანდისტული ტელეარხის, POS TV-ის საკონტროლო პაკეტის მფლობელია. ასევე, ქართული ოცნების სხვა საპარლამენტო, თუ საკრებულოს დეპუტატები და მათი ნათესავები.

გაიგე მეტი: TI — ამ კომპანიებს მიღმა ივანიშვილთან და მაღალჩინოსნებთან დაკავშირებული პირები დგანან და წლებია, სავარაუდო კორუფციით, ჯამურად 2 მლრ ლარზე მეტი მიიღეს