"ბარბი" მარგო რობისა და გრეტა გერვიგის გარეშე არ არსებობს

რაიან გოლინგმა CNN-თან მიცემულ ინტერვიუში ოსკარი 2024-ის ნომინაციების შესახებ ისაუბრა და განაცხადა, რომ მეორეხარისხოვანი როლის შემსრულებელი საუკეთესო მსახიობი კაცის კატეგორიაში ნომინაციის მიღებისთვის მადლიერია. თუმცა მსახიობმა ეჭვქვეშ დააყენა ჟიურის გადაწყვეტილება იმ ფაქტის შესახებ, რომ ინდივიდუალურ ნომინაციებში მარგო რობი და გრეტა გერვიგი დასახელებულები არ არიან.

///

შეგახსენებთ, რომ ცოტა ხნის წინ კინემატოგრაფიულ ხელოვნებათა და მეცნიერებათა ამერიკულმა აკადემიამ (AMPAS) 2024 წლის ოსკარის ნომინანტების სრული სია დაასახელა. მიუხედავად გულშემატკივრების მოლოდინისა, ბარბის რეჟისორი გრეტა გერვიგი წლის საუკეთესო რეჟისორის ნომინაციაში წარდგენილი არ არის. ასევე, მარგო რობი მთავარი როლის შემსრულებელი საუკეთესო მსახიობი ქალის კატეგორიის ნომინანტებში ვერ მოხვდა.

მიუხედავად იმისა, რომ მარგო რობიმ და გრეტა გერვიგმა ინდივიდუალური ნომინაციები ვერ მიიღეს, გრეტა გერვიგი წარდგენილია საუკეთესო ადაპტირებული სცენარის კატეგორიაში, მარგო რობი კი, საუკეთესო ფილმის კატეგორიაში, როგორც ბარბის ერთ-ერთი პროდიუსერი.

"ჩემთვის დიდი პატივია, რომ ჩემი კოლეგები შესანიშნავი ფილმების ასეთ გამორჩეულ მსახიობებთან ერთად სხვადასხვა კატეგორიაში დასახელდნენ. არასდროს მიფიქრია, რომ ამის თქმა მომიწევდა, მაგრამ ვამაყობ და დიდი პატივია, რომ პლასტმასის თოჯინა კენის განსახიერებისთვის ნომინაცია მოვიპოვე. არ არსებობს კენი ბარბის გარეშე და არ არსებობს ბარბის ფილმი მარგო რობისა და გრეტა გერვიგის გარეშე. ისტორიული და გლობალურად წარმატებული ფილმის შექმნა ყველაზე მეტად სწორედ ამ ორი ადამიანის დამსახურებაა", — განაცხადა რაიან გოსლინგმა.

რაიან გოსლინგის თქმით, იმედგაცრუებულია, რომ შესაბამის კატეგორიებში მარგო რობიმ და გრეტა გერვიგმა ნომინაციები ვერ მოიპოვეს. მსახიობმა ოსკარი 2024-ზე ნომინირება ამერიკა ფერეირას მოილოცა, რომელიც მეორეხარისხოვანი როლის შემსრულებელი საუკეთესო მსახიობი ქალის კატეგორიაშია წარდგენილი.

///

აღსანიშნავია, რომ ოსკარი 2024-ზე ბარბიმ 8 ნომინაცია მოიპოვა. მათ შორისაა საუკეთესო ფილმის, საუკეთესო ადაპტირებული სცენარის, კოსტიუმების საუკეთესო დიზაინის, ხმის საუკეთესო რეჟისურის და სხვა კატეგორიები. ოსკარი 2024-ის ნომინანტების სრული სია აქ შეგიძლია ნახო.