ნოემბერში HBO-ის გახმაურებული სერიალის დიდი პატარა ტყუილები გულშემატკივრებმა შეიტყვეს, რომ შოუ მესამე სეზონით ბრუნდება. სერიალის ერთ-ერთმა აღმასრულებელმა პროდიუსერმა და მსახიობმა, ნიკოლ კიდმანმა, ცოტა ხნის წინ მიცემულ ინტერვიუში ახალი სეზონის მეტი დეტალი გაამხილა.

ბოლო 4 წლის განმავლობაში სერიალის გაგრძელებაზე უამრავი მაყურებელი საუბრობდა, თუმცა მას შემდეგ, რაც 2021 წელს შოუს რეჟისორი ჟან-მარკ ვალე გარდაიცვალა, გუნდი დიდ პატარა ტყუილებზე მუშაობას აღარ განიხილავდა.

"ჟან-მარკ ვალეს დაკარგვით ყველანი შეძრულები ვართ. ამის შემდეგ დავიწყეთ მსჯელობა იმაზე, შეგვეძლო თუ არა სერიალის გაგრძელება მის გარეშე, თუმცა საბოლოოდ, ერთობლივად გადავწყვიტეთ, რომ პროექტი უნდა გაგრძელებულიყო. ახალი სეზონის დროში გაწერილი გეგმა უკვე გვაქვს. სერიალის გამოსვლამდე მეტ რამეს ვერ გავამხელ ამიტომ ჯობს, ენას კბილი დავაჭირო", — აღნიშნავს ნიკოლი.

კიდმანის თქმით, ის და დიდი პატარა ტყუილების კიდევ ერთი აღმასრულებელი პროდიუსერი, რიზ იუზერსპუნი, შოუს გაგრძელებასთან დაკავშირებით ერთმანეთს ახალ იდეებს ყოველდღიურად უზიარებენ.

მინისერიალად ჩაფიქრებული Big Little Lies, ვარსკვლავური სამსახიობო შემადგენლობის — რიზ უიზერსპუნის, ნიკოლ კიდმანის, შეილინ ვუდლის, ლორა დერნისა და ზოი კრავიცის მონაწილეობით, მაყურებელმა 2017 წელს იხილა. 2019 წელს გამოსულ მეორე სეზონში შოუს მერილ სტრიპიც შეუერთდა.

ავსტრალიელი მწერლის, ლიან მორიარტის, 2014 წელს გამოცემულ ამავე სახელწოდების რომანზე გადაღებულ სერიალს უდიდესი წარმატება ხვდა წილად. მან ემის 8 ჯილდოს, 4 ოქროს გლობუსის და სხვა პრესტიჟული ჯილდოების მოპოვება შეძლო.

იხილეთ ასევე: