რა ხდება: დღეს, 19 იანვარს, მართლმადიდებლური ეკლესია ნათლისღების დღესასწაულს აღნიშნავს. სამების საკათედრო ტაძარში იქადაგა მეუფე შიო მუჯირმა, პატრიარქის მოსაყრემ.

  • მისი ქადაგებისას ერთ-ერთი მინიშნება მიემართებოდა საზოგადოებრივ რეაქციებზე ხატის შესახებ, რომელიც სამებას პრორუსულმა პარტიამ, პატრიოტთა ალიანსმა შესწირა და მასზე მატრონა მოსკოველი და სტალიანია გამოსახული.

ასევე ნახეთ: "ასეთი ჩაზნექილი ცხვირი მაქვს?!" — პრორუსი თარხან-მოურავი უარყოფს, რომ მატრონას ხატზე ის და ინაშვილიც არიან გამოსახული

დეტალები: ქადაგებისას, შიო მუჯირმა უფალს შესთხოვა,

  • "გამოვსწორდეთ, აღარ ვცოდოთ და ვიცხოვროთ უფლისთვის სათნო ცხოვრებით;
  • რომ, ჩვენი ხალხიც, სულიერად უფრო ამაღლდეს;
  • რომ აღარ განმეორდეს ჩვენში ისეთი მძიმე ცოდვა, სიწმინდის ისეთი შეურაცხყოფა და მკრეხელობა, რომელიც ჩვენ, რამდენიმე დღის წინ ვიხილეთ ამ წმინდა ტაძარში [სამების საკათედრო ტაძარი]."

და მინიშნება გააკეთა ისეთი კანონის საჭროებაზე, რომ "მავანმა ვერც კი გაბედოს ასეთი რამის გაკეთება".

კონტექსტი: 2024 წლის 10 იანვარს, პარტია ქართული ოცნების წევრმა და პარლამენტის იურიდიულ საკითხთა კომიტეტის თავმჯდომარემ, ანრი ოხანაშვილმა, დაანონსა კანონპროექტი, რომელიც, მისი თქმით, "გაამკაცრებს სისხლისსამართლებრივ პასუხისმგებლობას რელიგიური ნაგებობებისა და ნივთების შეურაცხყოფისათვის".

სტრიქონებს შორის: 2018 წლის 24 აპრილს, პარლამენტის ადამიანის უფლებათა კომიტეტის სხდომაზე განიხილეს კანონპროექტი, რომლის ინიციატორიც პატრიოტთა ალიანსის დეპუტატი ემზარ კვიციანი იყო. აღსანიშნავია, რომ ქართული ოცნების იმ ხუთი დეპუტატიდან, რომელიც რელიგიური გრძნობების შეურაცხყოფის კანონით დარეგულირებას ეთანხმებოდა, ერთ-ერთი ანრი ოხანაშვილი იყო. ინიციატივა, რელიგიური გრძნობების შეურაცხყოფის კრიმინალიზებაზე, 2013 და 2016 წლებშიც იყო.

რელიგიური ნაგებობებისა და ნივთების შეურაცხყოფის კრიმინალიზების კანონპროექტს საქართველოში მომუშავე რამდენიმე უფლებადაცვითი ორგანიზაცია გამოეხმაურა, მათ შორის:

  • სოციალური სამართლიანობის ცენტრი (SJC): SJC აცხადებს, რომ ახალი კანონმდებლობა შესაძლოა, წინააღმდეგობაში მოდიოდეს გამოხატვის თავისუფლებით დადგენილ საერთაშორისო სტანდარტებთან და "მსგავსი სუბიექტური სფეროს (შეურაცხყოფის) მოწესრიგების მცდელობამ დაარღვიოს განჭვრეტადობისა და კანონის უზენაესობის კონსტიტუციური პრინციპები".
  • დემოკრატიის კვლევის ინსტიტუტი (DRI): DRI-ის მიხედვით, ევროპულ ქვეყნებში, ბოლო წლებში მოქმედი სასამართლო პრაქტიკა გადახრილია გამოხატვის თავისუფლების განუხრელად დაცვისკენ. მათ შორის, რელიგიასთან დაკავშირებული, შოკისმომგვრელი ქმედებაც უმეტესად მიჩნეულია საჯარო, საზოგადოებრივი განხილვების აუცილებელ ნაწილად და არა სისხლის სამართლის დანაშაულად.

"რელიგიური გრძნობების შეურაცხმყოფელი" ქმედების კრიმინალიზება დაუშვებელია", — წერია DRI-ს განცხადებაში.

გაიგე მეტი: როცა ნატა ფერაძეზე ვსაუბრობთ, ნიშნავს, ვსაუბრობთ სიტყვისა და გამოხატვის თავისუფლებაზე. აი, რატომ