წვრილმანი ხულიგნობისა და პოლიციის ბრძანების დაუმორჩილებლობის ბრალდებით, რზაიევს 15-დღიანი ადმინისტრაციული პატიმრობა მიესაჯა.

ორშაბათ საღამოს, შინაგან საქმეთა სამინისტროს მიერ რზაიევის დაკავებისა და განაჩენის დადასტურებამდე, მისმა ოჯახმა განაცხადა, რომ დაკავების შესახებ არაფერი იცოდნენ — მათი თქმით, შაჰინ რზაიევი, დაახლოებით, 14 საათზე ბაქოში, სახლთან ახლოს სურსათის საყიდლად გავიდა და აღარ დაბრუნდა. მასთან დაკავშირება ვეღარ მოახერხეს.

შსს-ს სამინისტროს სპიკერმა იბრაჰიმ ამირასლანლიმ ორშაბათს მედიას განუცხადა, რომ რზაიევი დაკავების დროს უხამსო სიტყვებს საჯაროდ, ხმამაღლა იძახდა. მისი თქმით, პოლიციის თანამშრომელმა ჟურნალისტი მას შემდეგ დააკავა, რაც მან გინების შეწყვეტაზე უარი თქვა.

რზაიევი მის წინააღმდეგ წაყენებულ ბრალდებას უარყოფს, ხოლო მისი ოჯახი ამტკიცებს, რომ ის დააკავეს ფეისბუქის პოსტის გამო, რომელიც მან დაწერა და მოგვიანებით, წაშალა.

რზაიევი კონფლიქტების შესახებ წერს. მანამდე ის იყო ომისა და მშვიდობის გაშუქების ინსტიტუტის დირექტორი აზერბაიჯანში, ვიდრე, 2016 წელს, ეს ორგანიზაცია ქვეყანაში ფუნქციონირებას შეწყვეტდა. მას შემდეგ, რზაიევი რეგიონულ გამოცემა ჯემ ნიუსთან თანამშრომლობდა.

ის არის, ჯერჯერობით, ბოლო ჟურნალისტი, რომელიც მედიის წინააღმდეგ მიმდინარე რეპრესიის ფონზე დააკავეს. პროცესები აბზასმედიაზე რეიდით და მათი რამდენიმე თანამშრომლის დაკავებით, ნოემბრის ბოლოს დაიწყო.

ის, ასევე, არის ორშაბათს დაკავებული მეორე ჟურნალისტი. ელნარა გასიმოვა, ჟურნალისტი, რომელიც აბზასმედიაში მუშაობს, დააკავეს და შეუფარდეს 2 თვითა და 17 დღით წინასწარი პატიმრობა. მას ბრალად კონტრაბანდა ედება.

აზერბაიჯანმა ნოემბრის ბოლოდან ათი მედიის თანამშრომელი დააკავა.

ქვეყანა, თებერვლის დასაწყისში, მომავალი საპრეზიდენტო არჩევნებისთვის ემზადება.

განახლება: სამშაბათს საღამოს, ბაქოს სააპელაციო სასამართლომ ბრძანა რზიაევის გათავისუფლება და სასჯელი შეუცვალა 50 აზერბაიჯანული მანათის (29 აშშ დოლარი) ოდენობის ჯარიმით.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.