ჰამასის მიერ ისრაელზე თავდასხმის თარიღის ხსენების გამო, თურქეთში ისრაელელი ფეხბურთელი საგივ იეხეზკელი კლუბიდან გააძევეს და დააკავეს. თურქული კლუბის, ანტალიასპორის, ფეხბურთელმა 14 იანვარს გამართულ თამაშში გოლი გაიტანა, რის შემდეგაც კამერას თავისი თეთრი ხელსახვევი აჩვენა, წარწერით "100 დღე. 7/10". წარწერა ისრაელზე ჰამასის თავდასხმიდან და მძევლების აყვანიდან 100 დღის შესრულებაზე მიუთითებდა.

იეხეზკელის ამ ჟესტს ჯერ სტადიონზე მყოფი გულშემატკივრების უკმაყოფილო შეძახილები მოჰყვა, მოგვიანებით კი სპორტსმენის საქციელი თურქეთის ფეხბურთის ეროვნულმა ასოციაციამაც დაგმო. მატჩის დასრულებიდან მალევე ანტალიასპორმა ფეხბურთელი კლუბიდან დაითხოვა. "ღაზაში ისრაელის მოწყობილი ხოცვა-ჟლეტის მხარდაჭერის" ბრალდებით, იეხეზკელი თურქეთის პოლიციამაც დააკავა. გამოძიება "საზოგადოებაში შუღლის გაღვივების" მიზეზით დაიწყო.

ისრაელელმა ფეხბურთელმა ახსნა, რომ მისი საქციელი "პროვოცირების მცდელობა" არ ყოფილა და ეს ანტისაომარი განაცხადი იყო.

"ომის მომხრე არ ვარ", — თქვა იეხეზკელმა, — "ღაზაში ისრაელელი ჯარისკაცები ტყვედ არიან ჩავარდნილები. მე მიმაჩნია, რომ ეს 100-დღიანი მონაკვეთი ახლავე უნდა დასრულდეს. მინდა, რომ ომი დამთავრდეს".

///

ჰამასი, რომელსაც მსოფლიოს არაერთი ქვეყანა და ორგანიზაცია, მათ შორის, აშშ და ევროკავშირი ტერორისტულ დაჯგუფებად მიიჩნევს, 2023 წლის 7 ოქტომბერს ისრაელს თავს დაესხა. თავდასხმას სულ მცირე 1300 ადამიანის სიცოცხლე ემსხვერპლა, მათგან უმრავლესობა მშვიდობიანი მოქალაქე იყო. ამასთან, ჰამასმა მძევლად აიყვანა 240-მდე ადამიანიც, რომელთაგან დაახლოებით 132 ისევ ტყვეობაში რჩება.

თავდასხმის შემდეგ ისრაელმა ღაზის სექტორის დაბომბვა დაიწყო, რასაც, ჰამასს დაქვემდებარებული ჯანდაცვის სამინისტროს ცნობით, 23 ათასზე მეტი ადამიანი ემსხვერპლა დღემდე. ამას გარდა, ბლოკადაში მოქცეულ ტერიტორიაზე ჰუმანიტარული კრიზისიც შეიქმნა, ღაზაში მცხოვრები ადამიანების კრიტიკულ მდგომარეობას ხაზი გაუსვა არაერთმა საერთაშორისო ორგანიზაციამაც, მათ შორის, წითელმა ჯვარმა და გაეროს ხუთმა სააგენტომ.

საერთაშორისო ორგანიზაციები და მსოფლიო ლიდერები მოითხოვენ ჰამასის მიერ აყვანილი მძევლების დაუყოვნებლივ გათავისუფლებასაც.

თურქეთის პრეზიდენტი რეჯეფ თაიფ ერდოღანი კი ოქტომბრიდან მოყოლებული აქტიურად უჭერს მხარს პალესტინას. ამასთან, ერდოღანი ჰამასს ტერორისტულ ორგანიზაციად არ მიიჩნევს. "ისრაელს, როგორც ომის დამნაშავეს, მსოფლიოს გავაცნობთ", — აღნიშნა თურქეთის ლიდერმა, რომელიც არაერთხელ დაუდანაშაულებიათ ადამიანის უფლებების დარღვევაში, მათ შორის, ეთნიკური ნიშნით — ქვეყანაში მცხოვრები ქურთების მიმართ.

ისრაელის თავდაცვის მინისტრის, იადავ გალანტის თქმით, "თავისი ქმედებებით, თურქეთი ჰამასის მარჯვენა ხელად იქცა".

ისრაელელი პოლიტიკოსები გამოეხმაურნენ საგივ იეხეზკელის დაკავებასაც.

"ეს არის თურქეთი 2024 წელს", — დაწერა სოციალურ ქსელში ქვეყნის ყოფილმა პრემიერმინისტრმა ნაფთალი ბენეტმა, — "სირცხვილი თურქეთის ხელისუფლებას".