მეცნიერებმა E. coli (რომელიც საჭმლით მოწამვლისას საშინელ დღეში გაგდებს) მინი მყარ დისკად აქციეს. ეს როგორ?

ჟურნალ Nature-ში გამოქვეყნებულ კვლევაში, ჰარვარდის უნივერსიტეტის მეცნიერებმა მოკლე ვიდეო ცოცხალი უჯრედის დნმ-ში მოათავსეს. როგორც ფილმს იწერთ ფლეშ-ბარათიდან, ისე გადმოწერეს მათ ვიდეო უჯრედიდან და ხელახლა ჩართეს. მეცნიერებს აქამდეც „აუტვირთავთ“ მონაცემები დნმ-ში, მაგრამ ეს პირველად მოხდა, როდესაც ის ხელახლა ჩართეს ბაქტერიიდან.

ძალიან მარტივია: დნმ რეალურად ინფორმაციის შენახვის გზაა, რომელიც დიდად არ განსხვავდება ციფრული დისკისაგან. მყარი დისკი 1-იანებსა და 0-იანებში ინახავს ინფორმაციას, ხოლო დნმ ამის ნაცვლად 4 ნუკლეოტიდს (ადენინი, გუანინი, თიმინი და ციტოზინი) იყენებს.

„ჩვენ შევიმუშავეთ სტრატეგია, რომელიც თარგმნის სურათის ან კადრის თითოეული პიქსელის ციფრულ ინფორმაციას დნმ-ის კოდად, ეს კი, თავის მხრივ, დამატებითი მიმდევრობებით ერთიანდება სპეისერებში [გენებს შორის არსებული არამაკოდირებელი დნმ-ის რეგიონი]. თითოეული კადრი სპეისერების კოლექცია ხდება“. - ამბობს კვლევის მთავარი ავტორი სეთ შიპმენი განცხადებაში.

ფოტო: Seth Shipman

ვიდეოს კადრები მოძრავი ფილმის ერთ-ერთი ყველაზე ადრეული წინამობრედია - Sallie Gardner at a Gallop. ფოტოების ამ სერიაზე აღბეჭდილია ცხენის ჭენება, რომელიც 1878 წელს ბრიტანელმა პიონერმა ფოტოგრაფმა ედვარდ მაიბრიჯმა გადაიღო. როდესაც ფოტოები ერთად ეწყობა, ისინი ანიმაციის ეფექტს ქმნიან. თავდაპირველმა ფოტოებმა მსოფლიოში ცნობილი მოძრავი ფილმის სტატუსი მოიპოვა, თუმცა, ფოტოსესიის თავდაპირველი მიზანი იმის გარკვევა იყო, სწევს თუ არა მიწიდან ცხენი ოთხივე ფეხს.

ეს კვლევა დემონსტრაციაა იმისა, თუ რამდენი მონაცემის შენახვა შეუძლია ჩვენს დნმ-ს. ეს შეიძლება უბრალოდ ტრაბახად ჩანდეს, თუმცა, თუ გავითვალისწინებთ ყოველ წამს შექმნილი მონაცემების რაოდენობას, ამან შეიძლება მონაცემების შენახვის უდიდესი პრობლემა გადაჭრას.

დნმ ულტრა-კომპაქტურია, რაც იმას ნიშნავს, რომ თეორიულად შენ შეგიძლია მსოფლიოში არსებული ყველა მონაცემი ერთ ოთახში შეინახო. მას ასევე შეუძლია, რომ ასობით ათასი წელი იყოს შენახული, თუ შესაბამის მდგომარეობაში იქნება.