რა ხდება: საქართველოს საგარეო საქმეთა სამინისტროში შეხევედრა გაიმართა საქართველოში დანიის სამეფოს საგანგებო და სრულუფლებიან ელჩთან, ანნე ტოფტ სორენსენთან.

რატომ დაიბარა ელჩი საგარეომ: ის სამინისტროში გამოიძახეს და განმარტებები მოსთხოვეს მას შემდეგ, რაც 2024 წლის 10 იანვარს დანიურ გამოცემაში მან ოპ-ედი გამოაქვეყნა, რომელშიც ბიძინა ივანიშვილი ოლიგარქად მოიხსენია.

  • ამას საქართველოს საგარეო საქმეთა სამინისტრო "არასწორ ფაქტებსა და პოლიტიკურ შეფასებებს" უწოდებს.

რა ვიცით შეხვედრის შესახებ: საგარეო საქმეთა სამინისტროს მიხედვით,

  • შეხვედრაზე ქართულმა მხარემ აღნიშნა, რომ სამწუხაროა პუბლიკაციაში არსებული მნიშვნელოვანი ფაქტობრივი უზუსტობები და არაობიექტური შეფასებები, რაც ხელს არ უწყობს ქვეყნის მიმართ საერთაშორისო საზოგადოების, მათ შორის, დანიელი მკითხველის პოზიტიურ დამოკიდებულების ჩამოყალიბებას.

"შეხვედრაზე ასევე ხაზი გაესვა რომ აღნიშნული პუბლიკაცია ცალკეული ძალების მხრიდან პოლიტიკური ინტერპრეტაციებისთვის იქნა გამოყენებული, რაც, ბუნებრივია ხელს უშლის ქვეყნის მიმართ ევროკავშირის მიერ განსაზღვრული მთავარი ამოცანის — დეპოლარიზაციის ეფექტიან განხორციელებას", — აცხადებს უწყება.

რა დაწერა ელჩმა: დანიის ელჩმა საქართველოში, ანე ტოფტ სორენსენმა გამოაქვეყნა ოპ-ედი, სადაც საუბრობს საქართველოს ევროპულ მისწრაფებებზე.

  • იმავე ოპ-ედში, ის ბიძინა ივანიშვილს ოლიგარქად მოიხსენიებს.
  • ელჩი აღნიშნავს, რომ მმართველი პარტიის, ქართული ოცნების დამფუძნებელმა ქონება 1990-იან წლებში, რუსეთში დააგროვა.
  • გარდა ამისა, ანა სორენსენი საუბრობს ქვეყნის შიგნით არსებულ მდგომარეობაზეც.
  • მისი შეფასებით, ბოლო წლების განმავლობაში რეფორმები შენელებულია.
  • მთავრობასა და ოპოზიციას შორის უთანხმოება კი იზრდება.

ბოლო ხაზი: საქართველოს საგარეო საქმეთა სამინისტროს განცხადებაში, ასევე, წერია, რომ "შეხვედრაზე დანიურმა მხარემ წუხილი გამოთქვა აღნიშნულის გამო და განაცხადა რომ სტატია გამიზნული იყო დანიის მხრიდან საქართველოს ევროკავშირში ინტეგრაციის პროცესის მხარდაჭერისთვის და სამწუხაროა, რომ ოპონენტების მხრიდან იგი უარყოფით კონტექსტში იქნა გამოყენებული."