მოკლედ: სამების საკათედრო ტაძრიდან სტალინის გამოსახულებიანი ხატის გამოტანის მოთხოვნით პეტიცია შეიქმნა.

  • პეტიციის მთავარი ადრესატი საქართველოს საპატრიარქოა.

რატომ უნდა გაიტანონ მატრონა მოსკოველის ხატი სამების ტაძრიდან: პეტიციის ტექსტის მიხედვით, სტალინის სახელს უკავშირდება "ქვეყანაში სისხლის გუბეების დაყენება", ასევე, რეპრესიები, რომელსაც შეეწირა უამრავი თანამემამულე.

  • "ეს ფაქტი შეურაცხყოფას აყენებს სტალინის რეჟიმის მიერ რეპრესირებული, დახვრეტილი და გადასახლებული ჩვენი ათასობით თანამემემულის ხსოვნას. ამ ფაქტს განვიხილავთ, როგორც სტალინური რეჟიმის მიერ რეპრესირებულთა ოჯახების შეურაცხყოფად", — წერია პეტიციაში.

ტექსტში აღნიშნულია, რომ სამების საკათედრო ტაძარში გამოფენილი ხატი არის რუსული ხატის ასლი, რომელმაც რუსეთშიც კი მკვეთრად უარყოფითი რეაქცია გამოიწვია.

  • ასევე, ტექსტის მიხედვით, სტალინის ე.წ. სტუმრობა მატრონა მოსკოველთან შეთხზული ამბავია, რომელსაც რეალობასთან საერთო არ აქვს.
  • "სრულიად გაუგებარია, თუ რატომ დაუშვეს სამების საკათედრო ტაძრის მესვეურებმა საბჭოთა დიქტატორის გამოსახულების გამოფენა ტაძარში", — ვკითხულობთ პეტიციაში.

ბოლო ხაზი: 6 იანვარს პარტია ევროპული საქართველოს წევრმა, გიორგი კანდელაკმა სამების ტაძარში გადაღებული ვიდეო გამოაქვეყნა, სადაც ჩანს მატრონა მოსკოველის ხატი, რომლის ერთ-ერთ ფრაგმენტზე იოსებ სტალინია გამოსახული.

  • 7 იანვარს საქართველოს პატრიოტთა ალიანსის წევრებმა ირმა ინაშვილმა გამოაქვეყნა ვიდეო, სადაც ამბობს, რომ მატრონა მოსკოველის ხატი, რომელზეც იოსებ სტალინია გამოსახული, სამების საკათედრო ტაძარს "მათ შესწირეს";
  • 9 იანვარს, აქტივისტმა ნატა ფერაძემ თავის სოციალურ ქსელში გამოაქვეყნა ვიდეო, სადაც მატრონა მოსკოველის ხატს ლურჯი საღებავი შეასხეს.
  • გუშინ, 10 იანვარს, ნატა ფერაძის სახლთან პრორუსული ძალადობრივი მოძრაობა ალტ-ინფომ აქცია გამართა. ისინი სამების ტაძარში მატრონა მოსკოველის ხატისთვის საღებავის შესხმას აპროტესტებენ. ადგილზე მობილიზებული იყო პოლიცია.