დაშავებული ძაღლი, რომელიც ბაღდათიდან თბილისში სამკურნალოდ ჩამოიყვანეს, მოკვდა. ამის შესახებ ინფორმაციას სოციალურ ქსელში ცხოველთა უფლებადამცველი მიშა კაჭკაჭიშვილი ავრცელებს.

24 დეკემბერს სოციალურ ქსელში გავრცელდა ვიდეო, რომელშიც ძალადობის მსხვერპლი ძაღლი ჩანდა. მოგვიანებით ცხოველი ბაღდათიდან თბილისში ჩამოიყვანეს. როგორც მიშა კაჭკაჭიშვილი წერდა, ძაღლს თავის მძიმე ტრავმა, ფილტვების შეშუპება და ნატყვიარი აღენიშნებოდა.

ძაღლს კლინიკა "ვეტ-მედში" რთული ოპერაცია ჩაუტარეს, რომელშიც ნეიროქირურგები იყვნენ ჩართული. ოპერაციამ წარმატებით ჩაიარა, თუმცა მოგვიანებით ძაღლი დაიღუპა.

მომხდართან დაკავშირებით გამოძიება სისხლის სამართლის კოდექსის 259-ე მუხლით მიმდინარეობს, რომელიც ცხოველის წამებას, მისდამი სასტიკ მოპყრობას ან სხვაგვარ ძალადობას გულისხმობს. დანაშაული ჯარიმით, შინაპატიმრობით ან თავისუფლების აღკვეთით ისჯება.