რა ხდება: მედიის ადვოკატირების კოალიცია, რომელიც 16 ორგანიზაციის გაერთიანებაა, ეხმიანება საზოგადოებრივი მაუწყებლის მენეჯმენტის გადაწყვეტილებას, დახუროს სხვადასხვა გადაცემა საზოგადოებასთან სათანადო კომუნიკაციისა და ახსნა-განმარტების გარეშე.

მედიაკოალიციაა: "ეს ერთგვარი გაგრძელებაა საზოგადოებრივი მაუწყებლის გარშემო განვითარებული მოვლენებისა, რომელიც კიდევ უფრო აძლიერებს შეფასებას, რომ მაუწყებელი მმართველი პარტიის, ქართული ოცნების, ზეგავლენის ქვეშ არის, ვერ ასრულებს მასზე დაკისრებულ მისიას, იყოს პოლიტიკურად ნეიტრალური, ობიექტური და მიუკერძოებელი მედია, და ის 2024 წლის საპარლამენტო არჩევნებს მოუმზადებელი ხვდება", — მიიჩნევენ ისინი.

ამ ამბავზე: ეთერში აღარ გავა 7 გადაცემა, მათ შორის, "კაცები" — საზოგადოებრივი მაუწყებლის განცხადება

კოალიცია შეშფოთებით აღნიშნავს მოვლენებს, რომლებიც წინ უძღოდა გადაცემების დახურვას: მმართველი პარტია ქართული ოცნების მიერ, აჭარის ტელევიზიის მრჩეველთა საბჭოს გაუქმება და მცდელობა, შეეცვალა დაფინანსების მოდელი, რომელიც მიზნად ისახავდა ტელევიზიის მთავრობაზე დამოკიდებულების გაზრდას. "მართალია, აღნიშნული გადაწყვეტილება არ იყო სისრულეში მოყვანილი და საბოლოოდ სხვა მოდელზე მოხდა შეთანხმება. თუმცა, აღნიშნული გადაწყვეტილებაც არ იყო საჯარო დისკუსიის და ფართო კონსენსუსის საგანი", — აღნიშნულია განცხადებაში, სადაც, ასევე მიუთითებენ, რომ:

  • "საზოგადოებრივი მაუწყებლის მენეჯმენტისა და მმართველი პარტიის დამოკიდებულებამ და ქმედებებმა ნოყიერი ნიადაგი შექმნეს მაუწყებელში ხელისუფლების სასარგებლო პოლიტიკური ჩარევისა და მანიპულაციისთვის.
  • ტელევიზია არ ფუნქციონირებს, როგორც ჭეშმარიტად დამოუკიდებელი და ანგარიშვალდებული მედია, არის ხელისუფლების ზეგავლენის ქვეშ და ეს განსაკუთრებით საშიშია იმ ფონზე, როდესაც ვუახლოვდებით კრიტიკულ 2024 წლის საპარლამენტო არჩევნებს."

ამ ამბავზე: პროდიუსერი: "გვითხრეს, რომ რამდენიმე გადაცემა იხურება" — რა ხდება პირველ არხზე

///

ბოლო ხაზი: კოალიცია მოუწოდებს საზოგადოებრივი მაუწყებლის გენერალურ დირექტორს, თინათინ ბერძენიშვილს, და ასევე, სამეურვეო საბჭოს, უზრუნველყოს მაუწყებლის პლურალისტური და ობიექტური საინფორმაციო პოლიტიკა, მედიის საქმიანობის გამჭვირვალობა, რეალური ანგარიშვალდებულება საზოგადოების მიმართ და მისი მონაწილეობა დიალოგში.

გაიგე მეტი: პარლამენტმა საზოგადოებრივი მაუწყებლების დაფინანსების წესი შეცვალა — რას ნიშნავს ეს?