საკონსტიტუციო სასამართლო მარიხუანის მოხმარებაზე პასუხისმგებლობას პიროვნული თავისუფლების კუთხით განიხილავს. პარლამენტის წინააღმდეგ მომზადებული სარჩელის ავტორია საქართველოს მოქალაქე გივი შანიძე.

კერძოდ, მოსარჩელე პიროვნული თავისუფლების განვითარების უფლებასთან მიმართებით, სადავოდ ხდის საქართველოს სისხლის სამართლის კოდექსის იმ ნორმას (273-ე მუხლი), რომელიც ითვალისწინებს პასუხისმგებლობას მარიხუანის უკანონოდ მოხმარებისთვის.

მოსარჩელის განმარტებით, ადამიანს აქვს უნარი, თავად განსაზღვროს ის საქმიანობა ან მოქმედება, რომელიც მისთვის სიკეთის მომტანია.

მოსარჩელის აზრით, ეს არის ქმედება, რომელიც მხოლოდ საკუთარი თავისკენ არის მიმართული და არ მოქმედებს საზოგადოებაზე, ამიტომ დასჯას არ აქვს ლეგიტიმური მიზანი.

მოსარჩელე აღნიშნავს, რომ მარიხუანის განმეორებითი მოხმარებისთვის პასუხისმგებლობა უნდა გაუქმდეს, ვინაიდან აღნიშნული ქმედების კრიმინალიზაცია მის მომხმარებელს სისხლისსამართლებრივი პოლიტიკის ინსტრუმენტად აქცევს.