2017 წლის პირველი ექვსი თვის სტატისტიკური მონაცემების მიხედვით, საქართველოს აეროპორტებში მგზავრთა ნაკადი 48.61%-ით, ხოლო საჰაერო გზით გადაზიდული ტვირთის მოცულობა 40.07%-ით გაიზარდა.

საქართველოს ეკონომიკისა და მდგრადი განვითარების სამინისტროს სსიპ სამოქალაქო ავიაციის სააგენტოს ცნობით, საქართველოს აეროპორტებმა, რეგულარული და ჩარტერული რეისების შედეგად გადაიყვანეს 1 609 183 მგზავრი, რაც წინა წლის ანალოგიურ მონაცემს 526 355 მგზავრით აღემატება.

ფოტო: სამოქალაქო ავიაციის სააგენტო

მგზავრთნაკადის ზრდა დაფიქსირდა საქართველოს სამივე საერთაშორისო აეროპორტში:

  • თბილისის საერთაშორისო აეროპორტი 2016 წლის მაჩვენებელთან შედარებით 44 პროცენტით მეტ მგზავრს, 1 287 228 ადამიანს მოემსახურა;
  • ქუთაისის საერთაშორისო აეროპორტში მგზავრთნაკადი თითქმის 94 პროცენტით გაიზარდა და 184 840 მგზავრი შეადგინა;
  • ბათუმის საერთაშორისო აეროპორტი მიმდინარე წელს მოემსახურა 133 418 მგზავრს, რაც დაახლოებით 44 პროცენტით მეტია წინა წლის ანალოგიურ მაჩვენებელზე.

რაც შეეხება ადგილობრივი დანიშნულების აეროპორტებს, სამოქალაქო ავიაციის სააგენტოს ცნობით, 2017 წლის პირველ ნახევარში:

  • მესტია წინა წელთან შედარებით 116.87%-ით მეტ, 3 240 მგზავრს მოემსახურა;
  • ამბროლაურის აეროპორტი, რომელმაც წელს პირველად მიიღო მგზავრები, 457 მგზავრს მოემსახურა.

ავიაციის სააგენტოს მონაცემებით, 2017 წელს, ზრდა დაფიქსირდა სატვირთო გადაზიდვების კუთხითაც. საჰაერო გზით გადაზიდული ტვირთის მოცულობამ დაახლოებით 16 942 ტონა შეადგინა, რაც 40 პროცენტით მეტია ვიდრე წინა წელს გადაზიდული ტვირთის ოდენობა. სააგენტოს ცნობით, 2017 წელს, წინა წელთან შედარებით დაახლოებით 14 პროცენტით მეტმა, 65 992-მა თვითმფრინავმა ისარგებლა საქართველოს საჰაერო სივრცით.