რა ხდება: ქართული ტელემედია ორგანიზაციები ჩინეთის ცენტრალურ ტელევიზია CCTV-სთან თანამშრომლობას იწყებენ, ინფორმაციას სამოქალაქო იდეა ავრცელებს.

• ორგანიზაციის შეფასებით, ამგვარი გადაწყვეტილება სრულიად გაუგებარი და დამაზიანებელია.

რა რისკებია: "არსებობს სერიოზული საფრთხე, რომ ისინი მარტივად გახდნენ დეზინფორმაციის მსხვერპლნი, გაუთვითცნობიერებლად მიიღონ მონაწილეობა ყალბი ამბების გავრცელებაში და ამით ქვეყნის არა მარტო ეროვნულ უსაფრთხოებას შეუქმნას საფრთხე, არამედ, საგარეო პოლიტიკურ კურსსაც, რომელიც მიმართულია დასავლურ ალიანსებში გაწევრიანებისკენ", — აღნიშნულია სამოქალაქო იდეის მიერ გავრცელებულ განცხადებაში.

• ორგანიზაცია აღნიშნავს, რომ ჩინეთის ცენტრალური ტელევიზია (CCTV) 65 წლის წინ, 1958 წელს დაარსდა და დღემდე ფუნქციონირებს, როგორც ჩინეთის სახალხო რესპუბლიკის ერთადერთი ავტორიზებული ეროვნული მაუწყებელი. ამჟამად, CCTV-ის მფლობელობაში 40 არხი შედის და წლიურად 300,000 საეთერო საათს იკავებს.

სამოქალაქო იდეა, ასევე, წერს, რომ:

• CCTV მჭიდროდ არის დაკავშირებული ჩინეთის კომუნისტური პარტიის (CCP) სხვადასხვა დანაყოფებთან. აქედან გამომდინარე, სწორედ პარტია განსაზღვრავს CCTV-ის მიერ გაშუქებული ინფორმაციისა და ახალი ამბების ტიპოლოგიას, რომელიც ხელმისაწვდომია ჩინეთის 1,4 მილიარდი მოქალაქისთვის.
• ცენტრალური ტელევიზიის ამჟამინდელი პრეზიდენტი, შენ ჰაიქსიონგი, არა მხოლოდ ჩინეთის კომუნისტური პარტიის წევრია, არამედ ცენტრალური კომიტეტის წევრის თანამდებობასაც იკავებს. მანამდე იგი ხელმძღვანელობდა გუანდონგის პროვინციის პროპაგანდის განყოფილებას.
• სამოქალაქო იდეას განცხადებით, გასაკვირი არ არის, რომ CCTV ყველაზე გავლენიანი საინფორმაციო და პროპაგანდისტული მედია ორგანიზაციაა, რომელიც ჩინეთის კომუნისტური პარტიის შეხედულებების გამოხატვასთან ერთად, აერთიანებს "საგამოძიებო" გადაცემებს, რომლებიც ემსახურება პარტიის ინტერესებს. ყველაზე პრობლემატურია ეჭვმიტანილთა საჯარო აღიარებების სერია, რომელსაც CCTV ხშირად აქვეყნებს გახმაურებულ საქმეებში ბრალდების წაყენებისა ან მათი დაპატიმრების წინ.
• CCTV-ის მნიშვნელოვანი კომპონენტია, ანტიდასავლურ პროპაგანდა, სწორედ ჭორებისა და დეზინფორმაციის გავრცელებაზე იხარჯება ამ ტელეკომპანიის საეთერო დროის ყველაზე დიდი ნაწილი. ეს განსაკუთრებით შესამჩნევი გახდა რუსეთ-უკრაინის ომისა და კოვიდ-19-ის პრიზმიდან.

"იმედს ვიტოვებთ, რომ ეს ქართული მედია საშუალებები აცნობიერებენ, რომ თანამშრომლობას იწყებენ არა რომელიმე დიდი ტელემედიასთან, არამედ ჩინეთის კომუნისტური პარტიის მთავარ პროპაგანდისტულ იარაღთან, ჩინეთის ცენტრალურ ტელევიზიასთან", — აღნიშნულია ორგანიზაციის განცხადებაში.

ბოლო ხაზი: სამოქალაქო იდეა არ აკონკრეტებს, თუ რომელი ქართული მედიასაშუალებები იწყებენ თანამშრომლობას CCTV-სთან, თუმცა 26 ნოემბერს BMG-მ გაავრცელა განცხადება, რომ CCTV-სთან ურთიერთგაგების მემორანდუმს და სალიცენზიო შეთანხმებას გააფორმებს.