აშშ-ს წარმომადგენლები უკრაინაში სამშვიდობო შეთანხმებაზე მოსალაპარაკებლად მოსკოვში დღეს ჩავლენ. ამის შესახებ ინფორმაციას The Guardian ავრცელებს.

"ჩვენი წარმომადგენლები რუსეთში ახლა მიდიან", — თქვა ტრამპმა. აშშ-ს პრეზიდენტმა ასევე აღნიშნა, რომ შეერთებულმა შტატებმა მიიღო "ზოგიერთი დადებითი ინფორმაცია ცეცხლის შეწყვეტის შესახებ".

მანამდე კრემლის სპიკერმა დიმიტრი პესკოვმა დაადასტურა, რომ რუსული და ამერიკული მხარეები დაკონტაქტებას ამ კვირაში გეგმავენ. მისივე თქმით, მოსკოვი გულდასმით სწავლობს ჯედაში შეხვედრის შემდგომ განცხადებებს, მაგრამ ჯერ არ მიუღია შეერთებული შტატებისგან საჭირო ინფორმაცია მოლაპარაკებების არსზე.

Reuters-ის ცნობით, რუსეთმა შეერთებულ შტატებს უკრაინის წინააღმდეგ ომის დასრულებისა და ვაშინგტონთან ურთიერთობების აღდგენის შესახებ შეთანხმების მოთხოვნების სია წარუდგინა და კრემლის ამჟამინდელი მოთხოვნები იმის მსგავსია, რაც რუსულმა მხარემ ადრე უკრაინას, შეერთებულ შტატებსა და NATO-ს წარუდგინა.

რუსეთის ადრინდელი მოთხოვნები მოიცავდა: უკრაინის NATO-ს წევრობაზე უარის თქმას, შეთანხმებას უკრაინაში უცხოური ჯარების არ განლაგების შესახებ და ყირიმისა და 4 უკრაინის რეგიონის საერთაშორისო აღიარებას რუსეთის შემადგენლობაში.

Reuters: რუსეთმა აშშ-ს უკრაინაში ომის დასრულების პირობები წარუდგინა

რუსეთის პრეზიდენტი ვლადიმერ პუტინი, სავარაუდოდ, დათანხმდება ცეცხლის დროებით შეწყვეტას, მაგრამ მას სურს დარწმუნდეს, რომ მისი პირადი პირობები შეთანხმებაში შედის, აცხადებენ Bloomberg-ის წყაროები. რუსი ოფიციალური პირები ამ დრომდე არ განიხილავდნენ ამერიკელ კოლეგებთან კონკრეტულ შეთანხმებას, რომელზეც უკრაინის დელეგაცია დათანხმდა საუდის არაბეთში მოლაპარაკებების დროს.

სააგენტოს წყაროები ასევე ამტკიცებენ, რომ პუტინი დიდი ალბათობით შეეცდება გადადოს შეთანხმების მიღწევის ვადები, რათა მოსკოვს ყველაზე ხელსაყრელი პირობები შეუქმნას. ერთ-ერთმა წყარომ თქვა, რომ კრემლმა შეიძლება მოითხოვოს უკრაინისთვის იარაღის მიწოდების შეწყვეტა, როგორც ცეცხლის შეწყვეტის პირობა.

11 მარტს საუდის არაბეთის ქალაქ ჯედაში გაიმართა მოლაპარაკებები კიევისა და ვაშინგტონის წარმომადგენლებს შორის. უკრაინულმა მხარემ მიიღო წინადადება 30-დღიანი ცეცხლის შეწყვეტის შესახებ, თუკი მას რუსეთი დათანხმდება. შეხვედრის შემდეგ შეერთებულმა შტატებმა გამოაცხადა იარაღის მიწოდების განახლება და დაზვერვის გაზიარების განახლება.

ამავე თემაზე:

პუტინი კურსკში სამხედრო ფორმით გამოჩნდა და თქვა, რომ რეგიონი მთლიანად უნდა გაათავისუფლონ უკრაინული ჯარებისგან