ერთ-ერთმა უდიდესმა სტრიმინგ პლატფორმამ, Spotify-მ, გასულ 2024 წელს რეკორდულად დიდი თანხა გადაუხადა მუსიკის ინდუსტრიას. კომპანიის ცნობით, ამ რიცხვმა $10 მილიარდი შეადგინა. სპოტიფაის წარმომადგენელი იქვე განმარტავს, რომ ისინი თანხას უხდიან არა პირდაპირ მუსიკოსებს, არამედ მუსიკაზე საავტორო უფლებების მფლობელებს — ხმისჩამწერ კომპანიებსა და გამომცემლებს — რომლებიც არტისტებთან გაფორმებული კონტრაქტების მიხედვით ანაწილებენ შემოსავალს.

რადგან კონტრაქტები ინდივიდუალურად ფორმდება, სხვადასხვა არტისტი განსხვავებულ წილს იღებს თავისი შემოქმედებიდან. თუმცა, საშუალოდ, შემსრულებელს შემოსავლის 16% ერგება ხოლმე. სტრიმინგ სერვისიდან მიღებული შემოსავალი კი ხშირად არცთუ სახარბიელოა, რადგან, სპოტიფაი, მაგალითად, თითოეულ სტრიმზე, დაახლოებით, $0,004-ს უხდის მუსიკოსს. ამდენად, მილიონი სტრიმიც კი მხოლოდ $4 ათასის მომტანია.

ამ ყველაფრის გათვალისწინებით, როგორც სტრიმინგ პლატფორმები, ასევე ხმისჩამწერი კომპანიები, ბოლო პერიოდში არაერთმა ცნობილმა არტისტმა გააკრიტიკა. ამერიკელმა პოპვარსკვლავმა ჩაპელ როუნმა წლევანდელ გრემიზე თავის სამადლობელ სიტყვაში ლეიბლები გაკიცხა და მუსიკოსებისთვის საარსებო ანაზღაურება მოითხოვა. პირდაპირ სტრიმინგ გიგანტი გააკრიტიკა ცნობილმა ისლანდიელმა მუსიკოსმა ბიორკმა და თქვა, რომ "სპოტიფაიზე დიდი საშინელება მუსიკოსებს არ დამართვიათ". ამასთან, წლის დასაწყისში რამდენიმე შემსრულებელი ბოიკოტის ნიშნად არ დაესწრო სპოტიფაის ორგანიზებულ ღონისძიებას.

სწორედ ანაზღაურებასთან დაკავშირებული დავის გამო, 2014 წელს კომპანიას ბოიკოტი გამოუცხადა ტეილორ სვიფტმაც, რომელიც შარშან სპოტიფაის წლის არტისტად დასახელდა 26 მილიარდი სტრიმით. მაშინ სვიფტმა პლატფორმიდან თავისი მუსიკა წაშალა, თუმცა, 2017 წელს ისევ დაუბრუნდა სტრიმინგ სერვისს.

სპოტიფაის კი მხოლოდ არასათანადო ანაზღაურების გამო როდი უცხადებენ ბოიკოტს. რამდენიმე წლის წინ, პლატფორმაზე დეზინფორმაციის დაშვების გამო, სპოტიფაიზე თავისი მუსიკის წაშლა არაერთმა მუსიკოსმა მოითხოვა, მათ შორის, ნილ იანგმა.