12 მარტს რუსეთის პრეზიდენტი ვლადიმერ პუტინი პირველად ეწვია კურსკის რეგიონს მას შემდეგ, რაც 2024 წლის აგვისტოში უკრაინულმა ძალებმა კურსკის ნაწილი დაიკავეს.

რუსეთის პრეზიდენტის ადმინისტრაციის ტელეგრამ-არხზე გავრცელებულ კადრებში ჩანს, რომ სამხედრო ფორმაში გამოწყობილი პუტინი რუსეთის შეიარაღებული ძალების გენერალური შტაბის უფროსს, ვალერი გერასიმოვს ხვდება.

Reuters-ის ცნობით, უმაღლესი სამხედრო ხელმძღვანელობის წინაშე სიტყვით გამოსვლისას, პუტინმა განაცხადა, რომ საჭიროა კურსკის რეგიონში უკრაინული ძალების სწრაფი დამარცხება.

პუტინის განცხადებით, რუსულმა ძალებმა მთლიანად უნდა გაათავისუფლონ რეგიონი უკრაინული ჯარებისგან. მისი თქმით, ყველა, ვინც კურსკის ოლქის ტერიტორიაზე იმყოფება და მოქალაქეების მიმართ დანაშაულებს სჩადის, ტერორისტად უნდა ჩაითვალოს, მათზე ჟენევის კონვენციების ნორმების გამოყენების გარეშე, განსაკუთრებით მაშინ, როცა საქმე უცხოელ დაქირავებულ პირებს ეხება.

"ყველა ადამიანი, რომელიც კურსკის ოლქის ტერიტორიაზე იმყოფება და მოქალაქეების მიმართ დანაშაულებს სჩადის, მოქმედებენ ჩვენი შეიარაღებული ძალების, სამართალდამცველი ორგანოებისა და სპეცსამსახურების წინააღმდეგ, რუსეთის ფედერაციის კანონების შესაბამისად არიან ტერორისტები. რუსეთის გენერალური პროკურატურა ასე აკვალიფიცირებს მათ ქმედებებს და სწორედ ამ მუხლით, "ტერორიზმით" არის მათ წინააღმდეგ აღძრული რუსეთის ფედერაციის საგამოძიებო კომიტეტის მიერ სისხლის სამართლის საქმე," — განაცხადა პუტინმა.

გერასიმოვმა აღნიშნა, რომ, დღევანდელი მდგომარეობით, რუსული ჯარები კურსკის ოლქში უკრაინის შეიარაღებული ძალების მიერ დაკავებული ტერიტორიის 86%-ზე მეტს აკონტროლებენ. მისივე თქმით, ბოლო 5 დღის განმავლობაში რუსულმა ჯარმა კონტროლის ქვეშ აიყვანა 24 დასახლებული პუნქტი.

ქალაქი სუჯა, რომელიც კურსკის რეგიონში მდებარეობს, უკრაინელმა ჯარებმა 2024 წლის აგვისტოში დაიპყრეს. მოსახლეობის უმეტესობამ სუჯა დატოვა, მაგრამ რამდენიმე ასეული მშვიდობიანი მოქალაქე დარჩა. უკრაინის სამხედრო ადმინისტრაციამ გენერალ ედუარდ მოსკალოვის ხელმძღვანელობით დარჩენილ მოსახლეობას ჰუმანიტარული დახმარება გაუწია.

2025 წლის იანვარსა და თებერვალში ქალაქზე საჰაერო დარტყმები განხორციელდა, რამაც დაზიანდა შენობები, მათ შორის სკოლა-ინტერნატი, სადაც მშვიდობიანი მოქალაქეები აფარებდნენ თავს. უკრაინის ხელისუფლების ცნობით, ერთ-ერთმა თავდასხმამ ოთხი ადამიანი დაიღუპა და რამდენიმე დაიჭრა.

2024 წლის დეკემბერში ვლადიმერ პუტინმა დანიშნა ალექსანდრე ხინშტეინი კურსკის ოლქის გუბერნატორის მოვალეობის შემსრულებლად და აღნიშნა, რომ საჭიროა კრიზისის მართვა ნაწილობრივ ოკუპირებულ რეგიონში. პუტინმა განთავისუფლებულ ტერიტორიებზე საცხოვრებელი, კომუნალური და ეკონომიკის აღდგენა მოითხოვა.

კურსკის რეგიონში ვითარება კვლავ დაძაბულია. რუსული ჯარები ცდილობენ უკრაინის შეიარაღებული ძალების ნაწილები მთლიანად განდევნონ რეგიონიდან. უკრაინის ჯარები წინააღმდეგობას უწევენ.

ამავე თემაზე:

Reuters: რუსეთმა აშშ-ს უკრაინაში ომის დასრულების პირობები წარუდგინა