CNN-ის ცნობით, დონალდ ტრამპმა, შესაძლოა, მიმდინარე კვირას პირველი ნაბიჯები გადადგას განათლების დეპარტამენტის გაუქმების მიმართულებით — აშშ-ის პრეზიდენტი ფედერალური მთავრობის ზომის მაქსიმალურად შემცირებას გეგმავს.

თეთრმა სახლმა მოამზადა აღმასრულებელი ბრძანება, რომლის ადრესატიც განათლების მდივანი ლინდა მაკმაჰონია, რომელსაც დაევალება, დაიწყოს დეპარტამენტის დაშლის პროცესი. ტრამპმა ბრძანებას ხელი, შესაძლოა, ხუთშაბათს მოაწეროს.

დონალდ ტრამპი დიდი ხანია აცხადებს, რომ დეპარტამენტის დახურვა სურს, თუმცა მისი სრულად გაუქმება კონგრესის თანხმობას საჭიროებს. აშშ-ის პრეზიდენტი გეგმავს, საკითხი კონგრესსაც წარმოუდგინოს და განათლების დეპარტამენტი საბოლოოდ დახუროს.

"ამერიკული განათლების ფედერალური პროგრამებით, დოლარებითა და უპასუხისმგებლო ბიუროკრატებით კონტროლის ექსპერიმენტმა დააზარალა ჩვენი შვილები, ჩვენი მასწავლებლები და ჩვენი ოჯახები", — ვკითხულობთ დოკუმენტის დრაფტში.

ეს პირველი შემთხვევა არ არის, როცა განათლების დეპარტამენტის გაუქმება, ან რომელიმე სხვა ფედერალურ სააგენტოსთან მიერთება დადგა დღის წესრიგში — მიუხედავად ამისა, ისტორიულად კონგრესის მხარდაჭერას მსგავსი ინიციატივები ვერასდროს იღებდნენ.

მედლინ დინმა, ფილადელფიელმა დემოკრატმა კონგრესმენმა ტრამპის ადმინისტრაცია მკაცრად გააკრიტიკა და განაცხადა, რომ მისთვის ეს სიურპრიზი არ არის.

"თუ დონალდ ტრამპი და მისი კულტის წევრი არ ხარ, განათლებული ელექტორატი გსურს — მათ სურთ მოქალაქეები, რომლებსაც განათლება არ აქვთ", — განაცხადა დინმა.